फ्रान्सको उत्पादन बहिष्कार गर्न टर्कीका राष्ट्रपतिले गरे आह्वान

टर्कीका राष्ट्रपति रेचेप तैयिप एर्दोआनदले कट्टरपन्थी इस्लामविरुद्ध फ्रान्सले लिएको कठोर अडानको विरोध गर्दै टर्कीका मानिसलाई फ्रान्सेली उत्पादन नकिन्न अपील गरेका छन् । 

टीभीमा सम्बोधन गर्दै उनले भने, ‘फ्रान्समा मुसलमानहरूमाथि दमन गरिएमा संसारका नेताहरू मुसलमानहरूको सुरक्षाका लागि अघि बढ्नुपर्छ ।’


Advertisement

फ्रान्सका राष्ट्रपति इम्मानुएल म्याक्रोंले उग्रवादी इस्लामबाट धर्मनिरपेक्षताको रक्षा गर्ने बताए । एर्दोआनले म्याक्रोंको बयानको कठोर आलोचना गरेका छन् । 

फ्रान्समा एक विद्यालय शिक्षकले पैगम्बर मोहम्मदको कार्टून देखाएकाले उनको घाँटी काटेर हत्या गरिएपछि इस्लामका विषयमा विवाद भएको छ । 
 


Advertisement

स्यामुएल प्याटी नामक ती शिक्षकलाई अक्टोबर १६ मा अब्दुल्लाह अन्जोरोफ नामक किशोरले टाउको काटेर हत्या गरेका थिए । 

इस्लाममा पैगम्बरको तस्वीर बनाउन पूरै प्रतिबन्ध छ । 

तर फ्रान्स धर्मनिरपेक्ष मुलुक हो र उसको राष्ट्रिय पहिचान नै त्यसमा अडिएको छ । कुनै एक धर्मको भावनालाई ध्यान दिँदा अभिव्यक्ति स्वतन्त्रताको हनन हुने र राष्ट्रिय एकता कमजोर हुने फ्रान्स सरकारको तर्क छ । 

सोमवार टीभीबाट प्रसारण गरिएको सन्देशमा एर्दोआनले फ्रान्सेली सामान बहिष्कार गर्ने अपील गरेका हुन् । 

उनले भने, ‘फ्रान्सको लेबल लागेको सामान नकिन्नुस्, तिनीहरूलाई भाउ नदिनुस् । फ्रान्समा मुसलमानहरूका विरुद्ध दोस्रो विश्वयुद्धमा यहुदीका विरुद्ध चलाएको जस्तो अभियान चलाइँदैछ ।’

त्यसअघि एर्दोआनले म्याक्रोंको मानसिक स्वास्थ्यको जाँच हुनुपर्ने समेत भनेका थिए । यसमा फ्रान्सले कडा आपत्ति जनाउँदै टर्कीमा रहेका आफ्ना राजदूत फिर्ता बोलाउने निर्णय लिएको थियो । 

पश्चिम युरोपमा सबभन्दा धेरै मुसलमान फ्रान्समै बस्छन् । धर्मनिरपेक्षताको नाममा आफूहरूलाई सताइने गरेको केही मुसलमानहरूको भनाइ छ । 

एजेन्सी
एजेन्सी

लेखकबाट थप...

कमेन्ट गर्नुहोस्