नेपाली १ हजारका नक्कली नोट बनाएर बजारमा सामान खरिद गरेको अभियोगमा २ भारतीयसहित १ नेपाली युवकलाई प्रहरीले पक्राउ गरेको छ ।

सोमवार जिल्ला प्रहरी कार्यालय कञ्चनपुरमा आयोजना गरिएको पत्रकार सम्मेलनमा नक्कली नोट, १ थान ल्यापटप, प्रिन्ट गर्नेे मशिनसहित कागजात र अभियुक्तलाई सार्वजनिक गरिएको छ ।

पक्राउ पर्नेमा भारतको बरेलीका अनुज शर्मा र उनकी पत्नी रितिका बम तथा भीमदत्त नगरपालिका–१८ बस्ने दीपक नाथ रहेको जिल्ला प्रहरी प्रमुख प्रहरी उपरीक्षक मुकुन्द मरासिनीले बताए । ‘अभियुक्तहरूले ग्रामीण भेग, वृद्ध तथा बालबालिकाहरू रहेको पसलमा गई नक्कली नोटले सामान खरिद गर्ने गरेको प्रारम्भिक अनुसन्धानबाट खुलेको छ,’ प्रहरी उपरीक्षक मरासिनीले भने, ‘भारतीय नागरिक शर्मा र बम (पतिपत्नी) डेरा गरी उक्त अवैध गतिविधिमा संलग्न रहँदै आएको देखिएको छ ।’

त्यसैगरी प्रहरीले बेदकोट नगरपालिका–५ पोलखरीमा गत कात्तिक १९ गते पुष्करसिंह बोहराको घरमा सीआईबीका प्रहरी भन्दै पेस्तोल देखाएर लुटपाट गर्ने गिरोहका फरार अभियुक्त शुक्लाफाँटा नगरपालिका–५ का २६ वर्षीय रवीन्द्र साउँदलाई पक्राउ गरेको छ ।

फरार रहेका साउँदलाई प्रहरी टोलीले बेलौरी नगरपालिका–८ पचुईबाट पक्राउ गरेको हो । सो घटनाका ३ जना अभियुक्तलाई प्रहरीले यसअघि नै पक्राउ गरिसकेको थियो ।