नेपाली कांग्रेसका संस्थापक नेता बीपी कोइरालाको परिवारका तीन सदस्य महामन्त्री डा. शशांक कोइराला, प्रभावशाली केन्द्रीय सदस्य डा. शेखर कोइराला र नेत्री सुजाता कोइरालाले आसन्न महाधिवेशनमा एक भएर अघि बढ्ने छनक दिएका छन् । 

स्वर्गीय गिरिजाप्रसाद कोइरालाको नाममा खोलिएको जीपी कोइराला फाउन्डेसनले बिहीवार सुनसरीमा आयोजना गरेको फूटबल प्रतियोगिता कार्यक्रममा कोइराला परिवारका तीन सदस्यले आफूहरू एक ठाउँमा रहेको सन्देश दिएका हुन् । 

झण्डै दुई वर्षपछि कोइराला पारिवारका सदस्यहरूले एक ठाउँमा उभिएर एक रहेको सन्देश दिएका हुन् । कांग्रेसको आसन्न चौधौं महाधिवेशनमा शेखर र शशांकले सभापतिमा उम्मेदवारी दिने बताइसकेका छन् । 

महाधिवेशनको मिति तोकिनुअघि नै शेखरले जिल्ला–जिल्लामा पुगेर कार्यकर्तासँग भेटघाट गरिरहेका छन् ।

१३ औं महाधिवेशनमा आफूले शशांकको लागि महामन्त्रीमा सघाएकाले यसपटक आफूलाई सघाउनुपर्ने शेखरको भनाइ छ । 

दुई वर्षअघि शशांकको निवासमा भेला भएर कोइराला परिवारका तीन सदस्यले १४ औं महाधिवेशनमा कोइराला परिवारबाट सभापतिमा उम्मेदवारी दिने घोषणा गरेका थिए । 

बिहीवारको कार्यक्रममा शशांकले १४ औं महाधिवेशनमा कोइराला परिवारका सदस्यहरू एक भएर अघि बढ्ने बताए । उनले आफूहरू एक रहेको र महाधिवेशनमा पनि मिलेर जाने बताए । 

शेखरले पनि १४ औं महाधिवेशनमा एक भएर अघि बढ्ने बताए । नेत्री सुजाताले गिरिजाप्रसाद कोइरालाले भन्ने गरेको सहमति, सहकार्य र एकताले बल पुग्ने बताइन् । 

कांग्रेसको १४ औं महाधिवेशन आगामी भदौ महिनामा गर्ने तयारी छ । महाधिवेशन नजिकिँदै गर्दा कोइराला परिवारका ती सदस्यहरूको भनाइलाई अर्थपूर्ण ठानिएको छ ।