भारत : कोरोना संक्रमित पितालाई छोडेर भागे छोरा

भारतको बिहार राज्यमा रहेको मुजफ्फरपुर जिल्लामा कोरोना संक्रमित आफ्ना पितालाई सडकमा छोडेर छोरा भागेका छन् । 

छोरोले छोडेपछि पतिको ज्यान बचाउनका लागि पत्नीले मानिसहरूलाई पुकारा गरिन् । पछि मानिसहरूले मद्दत गरेर अस्पताल लगे र त्यहाँ नै उनको मृत्यु भयो । 
 

दमचुक इलाकामा अर्जुन ओझा दुई दिनअघि कोभिड संक्रमित भएका थिए । दुई दिन उनी घरैमा बसे । परिवारले उनलाई उपचारका लागि कतै लगेन । छोरो सरकारी शिक्षक हो । 

टोलका मान्छेले दबाब दिएपछि छोरोले सदर अस्पतालबाट एम्बुलेन्स मगाएर पितालाई उपचारका लागि लग्यो । छोराबुहारी एम्बुलेन्सको पछिपछि बाइकमा गए । 

पछि छोरो बाटो बिग्रेको बहाना बनाएर अन्तै लाग्यो । त्यो देखेपछि एम्बुलेन्स चालकले पनि बाटैमा वृद्धलाई झारेर हिँड्यो । वृद्धसँग रहेकी पत्नीले सडकमा गुहार माग्दै पुकारिन् । कोही पनि सहायता गर्न आएन । 

पछि मुजफ्फरपुर डीएमले खबर पाए अनि वृद्धलाई भर्ना गर्न स्वास्थ्यकर्मीहरूलाई निर्देशन दिए । 

सदर अस्पताल पुग्दा अर्जुन ओझाको स्थिति निकै बिग्रेको थियो । त्यहाँबाट चिकित्सकहरूले उनलाई एसकेएमसीएच रिफर गरे । कागजी प्रक्रिया पूरा हुन्जेलसम्ममा वृद्धको ज्यान गयो ।