चालु आर्थिक वर्षमा लिइएको लक्ष्यमध्ये आर्थिक वृद्धिदरको लक्ष बाहेक अधिकांश परिसूचक सकारात्मक रहेको अर्थ मन्त्रालयले जनाएको छ । 

आर्थिक वर्ष २०७७/७८ को आर्थिक सर्वेक्षण सार्वजनिक गर्न आयोजित पत्रकार सम्मेलनमा अर्थ सचिव शिशिर ढुंगानाले अर्थतन्त्र धेरै जोखिममा नभएको बताएका हुन् । 

चालु आर्थिक वर्षमा ७ प्रतिशतको लक्ष्य राखेकोमा ५ प्रतिशत हुनसक्ने अनुमान गरिएको उनले बताए । गत फागुन सम्ममा ४ दशमलव ४ भनेपनि औषतमा ५ प्रतिशतमा हुनसक्छ भन्ने अनुमान रहेको उनले बताए । 

कोभिडको दोस्रो लहरका कारण केही हदसम्म अर्थतन्त्र शिथिल बनेपनि समग्र परिसूचक सकारात्मक रहेको उनले बताए ।

‘अर्थतन्त्रका परिसूचक सवल छन, विनिमय संचिति सन्तुलित छ, मूल्यबृद्धि नियन्त्रित छ, आयात निर्यात ठीक छ र वैशाख सम्मको राजश्व संकलन राम्रो छ’ ढुंगानाले भने, ‘आर्थिक बृद्धि बाहेकका बाहेक अन्य सूचक राम्रा छन् । रेमिट्यान्स ८ दशमलव ६ प्रतिशत बढेको छ अर्थतन्त्रमा धेरै जोखिम अवस्थामा छैन । निषेधाज्ञा भन्दा अगाडीको ट्रेन्ड हेर्दा अर्थतन्त्रको अवस्था सन्तोषजनक नै छ ।’

अर्थमन्त्रालयमा पत्रकार सम्मेलन गरेर अर्थमन्त्री विष्णु पौडेलले आर्थिक वर्ष २०७७/७८ को आर्थिक सर्वेक्षण सार्वजनिक गरेका छन् । सरकारले आर्थिक वर्ष २०७८/७९ को लागि भोलि बजेट सार्वजनिक गर्दैछ ।