नवनियुक्त स्वास्थ्य तथा जनसंख्या मन्त्री शेरबहादुर तामाङले मन्त्रिमण्डलको सदस्यको हैसियतले आफ्नो सम्पत्ति विवरण सार्वजनिक गर्ने घोषणा गरेका छन् ।

मन्त्री नियुक्त भएपछि सोमवार पहिलोपटक पत्रकार सम्मेलन गर्दै तामाङले वेबसाइटमार्फत सम्पत्ति विवरण सार्वजनिक गर्ने घोषणा गरे ।

‘सार्वजनिक पदधारण गरेका सबै व्यक्तिले सम्पत्ति विवरण सार्वजनिक गर्नुपर्छ,’ उनले भने ।

मन्त्री तामाङले कोरोनाविरुद्ध लडाइँ लड्नु आफ्नो प्राथमिकता रहेको बताए । उनले कोरोनाबाट जनतालाई बचाउनु आफ्नो प्राथमिकता रहेको बताए ।

कोरोना भाइरससँग लड्न खोपको व्यवस्थापन सबैभन्दा पहिलो कुरा रहेको मन्त्री तामाङले बताए । ‘आमनागरिकलाई खोपको सुनिश्चितता गर्न बजेट छुट्याएरै खोपको व्यवस्थापनको तयारीमा लागेका छौं,’ उनले भने, ‘खोप प्राप्त नहुँदासम्म सुरक्षित बसिदिनुहोला, सुरक्षाका मापदण्ड अपनाइदिन आग्रह गर्दछु । हामी खोपको व्यवस्था मिलाउँदैछौं ।’

धेरैभन्दा धेरै नागरिकको कोरोना जाँच गरेर अन्य नागरिकतालाई संक्रमण नहोस् भन्नेमा सरकारको प्रत्यक्ष संलग्नता रहने मन्त्री तामाङले बताए ।

मन्त्री तामाङले मन्त्रालयबाट गरिने प्रत्येक काम पारदर्शी ढंगले गरिने र हरेक कामहरू पारदर्शिताको कसीमा जाँचिने बताए । ‘केही विषयहरू उठ्यो भने त्यो कुरालाई सबै चिज शतप्रतिशत नहुन सक्छ, हामीले गरेका काममा कहीँकतै त्रुटि हुन खोज्यो भने खबरदारी गर्ने जिम्मेवारी तपाईंहरूको हो । खबरदारीलाई हामी ग्रहण गर्नेछौं,’ उनले भने ।