सांसद अपहरणमा नाम जोडिएको भन्दै कांग्रेस सांसदले मागे शंकर पोखरेलको राजीनामा

सांसद अपहरणमा नाम जोडिएको भन्दै नेपाली कांग्रेसका सांसद प्रकाश पन्थले लुम्बिनी प्रदेशका मुख्यमन्त्री शंकर पोखरेलको राजीनामा माग गरेका छन् ।

शुक्रवार बसेको राष्ट्रिय सभा बैठकको विशेष समयमा कांग्रेस सांसद पन्थले सांसद अपहरण सम्बन्धमा लुम्बिनी प्रदेश सभाले उच्चस्तरीय छानबिन समिति गठन गर्नुपर्ने बताएका हुन् । 

‘लुम्बिनीको मुख्यमन्त्रीको कार्यालय सांसदलाई थुन्ने ठाउँ बनेछ, यो मानवताविरोधी काम हो । सांसदलाई थुन्ने गुण्डागर्दी शैलीको विरोध गर्दछु,’ सांसद पन्थले भने, ‘मुख्यमन्त्रीमा अलिकति पनि राजनीतिक नैतिकता छ भने राजीनामा गर्नुस्, अन्यथा तपाईंको पनि बार्दलीको यात्रा शुरू हुनेछ ।’ 

जसपा सांसद प्रमिला कुमारीले पनि सांसद अपहरणमा संलग्नमाथि कारवाहीको माग गरिन् ।

‘लुम्बिनी प्रदेशकी सांसद विमलाकुमारी खत्री वलीको मुख्यमन्त्री शंकर पोखरेलको निर्देशन र एमाले सचेतक भूमिश्वर ढकालको सहभागितामा अपहरण गरेर मुख्यमन्त्रीको निवासमा बन्धक बनाइनु  खेदजनक छ,’ उनले भनिन्, ‘अविश्वासको प्रस्ताव फेस गर्न नसक्ने, बजेट ल्याउन नसक्ने मुख्यमन्त्री आफैं अपहरणमा संलग्न रहेकोले कारवाहीको माग गर्दछु ।’ 

यसअघि लुम्बिनीकी सांसद वलीले आफूलाई ५ दिनसम्म मुख्यमन्त्री कार्यालयमा बन्धक बनाइएको भन्दै बिहीवार पत्रकार सम्मेलनको आयोजना गरेकी थिइन् । 

एमाले सचेतक ढकालले भने वलीको चाहनाअनुसार नै मुख्यमन्त्रीको निवासमा राखिएको बताएका थिए ।