१ वर्षको अवधिमा स्याङ्जाका २४७ जना फरार प्रतिवादी पक्राउ परेका छन् ।

विभिन्न मुद्दामा कैद तथा जरिवानाको सजाय तोकिएकामध्ये गत आर्थिक वर्ष २०७७/७८ मा स्याङ्जामा उक्त संख्यामा फरार प्रतिवादी पक्राउ परेका हुन् ।

जिल्ला प्रहरी कार्यालय स्याङ्जाका प्रहरी नायब उपरीक्षक एवं प्रहरी प्रवक्ता राजेन्द्रप्रसाद अधिकारीका अनुसार विभिन्न घटना घटाई मुद्दा लागेका फरार प्रतिवादीलाई पक्राउ गरी कैद तथा जरिवानाको सजाय भुक्तान गराउने कार्यलाई तीव्रता दिएसँगै ठूलो संख्यामा प्रतिवादी पक्राउ परेका हुन् ।

जिल्ला प्रहरी कार्यालय स्याङ्जासहित मातहतका जिल्लास्थित प्रहरी कार्यालयमार्फत खोजीकार्यलाई प्राथमिकता दिएसँगै ठूलो संख्यामा फरार प्रतिवादी पक्राउ परेका प्रवक्ता अधिकारीले बताए ।

स्याङ्जा जिल्ला अदालतले फैसला सुनाएकामध्ये पक्राउ परेका फरार प्रतिवादी धेरैजसो सार्वजनिक अपराध, गाली बेइज्जत, कुटपिटका छन् । 

त्यसैगरी साधारण चोरी, लागूऔषध, वैदेशिक रोजगार कसुर, करकाप, सम्बन्धविच्छेद, सवारी ज्यान मुद्दा, नाता कायम, माना चामल, अंशबण्डा, चेक अनादर, हाडनाता करणी, अंश दर्ता, हातहतियार तथा खरखजाना, बहुविवाह, जालसाजी, जुवातास मुद्दामा कैद तथा जरिवाना तोकिएका फरार प्रतिवादी पक्राउ परेका हुन् ।

‘प्रहरीको सक्रियता तथा विभिन्न गोप्य स्रोतबाट प्राप्त विशेष सूचनाका आधारमा फरार प्रतिवादीलाई पक्राउ गरी कानूनी दायरामा ल्याइएको छ,’ प्रहरी प्रवक्ता अधिकारीले भने, ‘देशका विभिन्न ठाउँमा लुकेर बसेका वा लामो समयपछि घर फर्किएका पक्राउ परेका छन् भने केही संख्यामा प्रतिवादी आफैं सजाय भुक्तानीका लागि पनि आउने गरेका छन् ।’

जिल्लामा करीब १ हजारको हाराहारीमा फरार प्रतिवादी रहेकामध्ये हालसम्म ५०० भन्दा बढी पक्राउ परिसकेका प्रवक्ता अधिकारीले बताए । उनका अनुसार फरार प्रतिवादीमध्ये केही देशभित्रै नरहेका र धेरैको मृत्यु समेत भइसकेकाले अब करीब १५० जनाको हाराहारीमा प्रतिवादी फरार रहेका छन् ।

फरार रहेकाको खोजी तीव्र पारेसँगै पक्राउ पर्ने क्रम बढ्दै गएको छ ।