नेकपा एकीकृत समाजवादीकी केन्द्रीय सदस्य तथा नेत्री रामकुमारी झाँक्रीले १ नम्बर प्रदेशका मुख्यमन्त्री भीम आचार्य  र बागमती प्रदेशकी मुख्यमन्त्री अष्टलक्ष्मी शाक्यले दल रोजेर एकीकृत समाजवादीमा आए मुख्यमन्त्री कायमै राखिने बताएकी छन् ।

‘भदौ २२ गतेसम्म दल छान्ने अधिकार छ,’ नेत्री झाँक्रीले भनिन्, ‘उहाँहरू आउनुभयो भने विश्वासको मत दिलाउन हामी आफैं खट्ने छौं ।’

नेत्री झाँक्रीले नेकपा एसका कारण सरकार विस्तारमा ढिलाइ नभएको बताइन् । शनिवार विराटनगरमा सञ्चारकर्मीसँग कुरा गर्दै नेत्री झाँक्रीले सरकार विस्तार गरेर प्रभावकारी बनाउन भनेर प्रधानमन्त्री शेरबहादुर देउवालाई भनिसकेकाले सरकार विस्तार गर्न एकीकृत समाजवादीले कुनै अप्ठ्यारो नपारेको समेत बताइन् । 

‘एमालेमा हुदाँ सरकारमा जाने/नजाने भन्ने विषयमा निर्णय केही भएको थिएन,’ उनले भनिन्, ‘भर्खरै मात्र सरकामा जाने ढोका खुला भएको छ, सरकारमा सहभागी हुने/नहुने भन्ने विषयमा अहिले पनि पार्टीभित्र  निर्णय भइसकेको छैन ।’

नेत्री झाँक्रीले एमालेमै बसेका दोस्रो पुस्ताका नेताहरूलाई स्वार्थीको संज्ञा दिइन् । ‘उहाँहरू आउनुहुन्छ भनेर पार्टी बनाइएको होइन, केपी ओलीले कम्युनिस्ट आन्दोलनलाई तहसनहस बनाएका कारण वैकल्पिक शक्ति निर्माण गर्नका लागि नयाँ पार्टी बनाएका हौं,’ उनले भनिन् । नयाँ पार्टीमा युवालाई पहिलो प्राथमिकता दिइने उनले बताइन् ।

झाँक्री १ नम्बर प्रदेशका मुख्यमन्त्री भीम आचार्यको गृहनगर इनरुवाको कार्यक्रममा सहभागी हुन जाने क्रममा विराटनगर आएकी हुन् । नेकपा एकीकृत समाजवादी सुनसरीले इनरुवामा कार्यकर्ता भेला राखेको छ ।