एमालेको नाराबाजी नरोकिएपछि प्रतिनिधि सभाको बैठक मंगलवारसम्मका लागि स्थगित

अवरोध खुलाउने प्रयास स्वरूप छलफल गर्दा समेत प्रमुख प्रतिपक्षी दल नेकपा एमालेले अवरोध कायमै राखेपछि सभामुख अग्निप्रसाद सापकोटाले मंगलवारसम्मका लागि बैठक स्थगित गरेका छन् ।

आइतवारको पहिलो बैठकमा एमाले सांसदहरूले नाराबाजी गरेपछि बैठक स्थगन गरेर सभामुख सापकोटाले एमाले प्रमुख सचेतक विशाल भट्टराई, सचेतक शान्ता चौधरी, सांसद खगराज अधिकारी लगायतसँग छलफल गरेका थिए ।

कानूनमन्त्री ज्ञानेन्द्रबहादुर कार्की समेतको सहभागितामा भएको छलफल लगत्तै बसेको दोस्रो बैठकमा समेत एमाले सांसदहरूले नाराबाजी गरे ।

सभामुखले बैठक शुरू भएको जानकारी गराउनेबित्तिकै एमाले सांसदहरू वेलमा पुगेका थिए ।

सदन सञ्चालन गर्ने वातावरण बनाउन पटक-पटक आग्रह गर्दा पनि एमालेको नाराबाजी नरोकिएपछि सभामुख सापकोटाले मंगलवार दिउँसो १ बजेसम्मका लागि बैठक स्थगित गरिएको घोषणा गरे ।

पार्टीले माधव नेपालसहित १४ जना सांसदमाथि गरेको कारवाही सदर नगरेको भन्दै एमाले समाभुखसँग रुष्ट छ ।

यसअघि बुधवार र शुक्रवार बसेका बैठकमा पनि एमालेले नाराबाजी गरेको थियो ।