केपी शर्मा ओली नेतृत्वको सरकारले सातवटै प्रदेशमा प्रदेशस्तरीय सरुवा रोग अस्पताल स्थापना गर्ने घोषणा गरेको थियो । 

२०७७ जेठ २ गते राष्ट्रपति विद्यादेवी भण्डारीले प्रस्तुत गरेको सरकारको वार्षिक नीति तथा कार्यक्रममा प्रयोगशाला परीक्षण सेवा सहित ३ सय शय्याको केन्द्रीय र ५० शय्याको प्रदेश स्तरीय सरुवा रोग अस्पताल स्थापना गर्ने उल्लेख गरिएको थियो ।

सातवटै प्रदेशमा सरुवा रोग अस्पताल बन्ने भन्ने सुन्दा स्वाभाविकरूपमा प्रदेश १ का जनतामा पनि खुशियाली छायो । त्यही कार्यक्रमअन्तर्गत २०७७ साल माघ १९ गते मोरङको सुन्दरहरैँचा नगरपालिका– ११ कर्जुनामा अस्पताल भवनको शिलान्यास गरियो ।

तत्कालीन संस्कृति, पर्यटन तथा नागरिक उड्यन मन्त्री एवं पूर्व स्वास्थ्यमन्त्री समेत रहेका भानुभक्त ढकालले आफ्नै निर्वाचन क्षेत्रमा अस्पताल भवन शिलान्यास गराउन सफल भए ।

साँझमा लाइट बालेर भएपनि ढकालले भवन शिलान्यास गरेका थिए । शिलान्यास गरेको नौ महिना बित्न लागेको छ, तर त्यहाँ सरकारी निकायका कोही पनि पुगेका छैनन् ।

अझै रोचक कुरा त अस्पताल बन्ने भनेर शिलान्यास गरिएको स्थानमा लहलह धान झुलिरहेको छ ।

पहिलो चरणको कोरोना महामारीमा बेला शिल्यान्यास गरिएको अस्पताल बन्ने छाँटकाँट दोस्रो महामारी उत्कर्षमा पुगेर तल झरिसक्दा पनि देखिएको छैन ।

घरआँगनमै अस्पताल आउला र स्वास्थ्य सेवा लिउँला भन्ने कर्जुनाका जनतामा अब अस्पताल बन्छ भन्ने कुनै आशा बाँकी देखिन्न । तर दलहरूले भाषण भने गरिरहन्छन् भन्ने उनीहरूलाई लागेको छ ।

‘सरुवा रोग अस्पताल आउने चुनावमा चुनावी घोषणा पत्रका लागि थपिने देखियो,’ सञ्चारकर्मी समेत रहेका स्थानीय लीलानाथ गच्छदारले भने ।

बीपी कोइराला स्वास्थ्य विज्ञान प्रतिष्ठान धरानको स्वामित्वमा रहेको १४ बिघा जमिनमा सरुवा रोग अस्पताल निर्माण गर्ने जनाइएको थियो ।

अस्पताल शिलान्यासमा मन्त्री ढकाल, राष्ट्रिय सभा सदस्य रमेशजंग रायमाझी, तत्कालीन सामाजिक विकास मन्त्री हिक्मतबहादुर कार्की, सोही क्षेत्रका प्रदेश सांसद राजकुमार ओझा, मेयर शिवप्रसाद ढकाल लगायतका नेता पुगेका थिए । उनीहरूले तत्काल अस्पताल निर्माण शुरू हुने बताएका थिए ।

अस्पताल बन्ने कुनै छाँटकाँट नदेखेपछि अहिले स्थानीय निराश छन् । जनताको स्वास्थ्यमा पनि नेताले राजनीति गर्दा दुःख लागेको स्थानीय कृष्ण न्यौपाने बताउँछन् । 

अस्पताल बन्छ भन्नेमा स्थानीय तहका जनप्रतिनिधि समेत ढुक्क छैनन् ।

‘तत्कालीन मन्त्री आफैँ आएर शिलान्यास गर्नुभएको छ, बन्दैन त कसरी भन्नु, तर बन्छ भनौँ भने कुनै छाँटकाँट देखिएको छैन,’ सुन्दरहरैँचा– ११ का वडाध्यक्ष विशमलाल चौधरीले भने, ‘यो अस्पतालको विषयमा हामी सम्झिने, पानी छम्किने अवस्थामा पुगेका छौं ।’

अस्पताल बनाउनका लागि स्वास्थ्य मन्त्रालयले ८ करोड बजेट प्रदेश १ को सामाजिक विकास मन्त्रालयमा पठाएको थियो ।

अस्पताल बन्दा कसले जस लिने भन्ने अन्योलले त्यो रकम खर्च हुन नसकेको कर्मचारीहरू बताउँछन् । सामाजिक विकास मन्त्रालय र भौतिक पूर्वाधार विकास मन्त्रालयबीच यस विषयमा टसल छ ।

संरचना बनाउने काम आफूहरूले पाउनुपर्ने भन्दै भौतिक  पूर्वाधार मन्त्रालयले च्याँखे थापेको सामाजिक विकास मन्त्रालयका एक कर्मचारीले बताए ।

अर्कातर्फ संघीय सरकारको संघीय इकाइ कार्यालयमार्फत निर्माण गर्नुपर्ने कुराले समेत समस्या भएको ती कर्मचारीले बताए ।

कोरोनाका कारण अस्पतालको डीपीआर समेत निर्माण गर्न ढिला भएको सामाजिक विकास मन्त्रालयका प्रवक्ता कृष्ण पोखरेलले बताए । 

त्यसयता सामाजिक विकास मन्त्रालयमा दुई मन्त्री बनिसकेका छन् । यसपटक भने बजेट नै नआएको सामाजिक विकास मन्त्रालयले जनाएको छ । 

त्यसो त अस्पताल बनाउने भनिएको ठाउँनजिक अर्को एउटा भवन अलपत्र छ । औषधि उत्पादन गर्ने लक्ष्य राखेर बनाइएको भवन सञ्चालनमा नआउँदा अवैध धन्दा समेत चल्ने गरेको छ ।

पाँच बिघा क्षेत्रफलमा फैलिएको उक्त भवनको तीनवटा ब्लक दुई दशकअघि बनेका हुन् ।

२०५५ सालमा शेखर कोइरालाले उक्त भवन शिलान्यास गरेका थिए । भवन शिलान्यास गरेपछि पटक–पटक कांग्रेस सरकारमा सहभागी भएपनि त्यो विषयमा चासो दिएको छैन ।