प्रतिनिधि सभाको प्रयोजन सकियो, अबको निकास निर्वाचन : विष्णु पौडेल

नेकपा एमालेका उपमहासचिव तथा पूर्व अर्थमन्त्री विष्णु पौडेलले प्रतिनिधि सभाको प्रयोजन सकिएको दाबी गरेका छन् । 

प्रतिनिधि सभा चल्नै नसक्ने अवस्थामा पुगेको बताउँदै अब मुलुकको निकास ताजा जनादेश रहेको धारणा राखे । 

नेकपा एमाले स्याङ्जा–रूपन्देही सम्पर्क समाजद्वारा बुटवलमा आयोजित प्रथम भेलालाई शुक्रवार सम्बोधन गर्दै पौडेलले भने, ‘प्रतिनिधिसभा कामै गर्न नसक्ने अवस्थामा पुगेको छ । प्रतिनिधिसभा अब चल्न सकेन । बैठक बस्छ स्थगित हुन्छ । मन्त्रीहरू दौडेर रोष्टममा पुग्छन् । यस्तो हालतबाट सभा चल्न सक्दैन त्यसैले प्रतिनिधिसभाको प्रयोजन सकियो ।’ अब निकास नै निर्वाचन भएकाले त्यसतर्फ जुट्न कार्यकर्तालाई पौडेलले आग्रह गरे । 

पौडेलले प्रतिनिधिसभाका सभामुख अग्नि सापकोटा एमाले विभाजनको मतियार बनेको आरोपसमेत लगाए । ‘तटस्थ जिम्मेवारी पूरा गर्नुपर्ने सभामुख ‘बायस’ हुनुभो । उहाँ एमाले विभाजनको अंग बन्नु भयो । सभामुखको यो कदम नसच्चाएसम्म सदन चल्दैन,’ उनले भने । 

एमाले विभाजनले पार्टीमा कुनै क्षति नभएको बताउँदै पौडेलले सही नेतृत्व र व्यापक जनआधार र अझै पनि ठूलो शक्ति एमाले नै रहेको उनको दाबी छ । 

‘कांग्रेसले कुनै कम्युनिष्टसँग मिलेर चुनाव लडिँदैन भनिसकेको छ,’ पौडेलले भने, ‘कांग्रेसको पछि लागेका माधव नेपालका ओठमुख सुक्ने स्थिति छ । एकातिर वडा अध्यक्ष पनि जित्न नसक्ने बेदुराम भुसाल र अर्कोतिर मुकुन्द न्यौपाने राखेर हिँडेका नेपाल २०५४ मा वामदेवले पार्टी विजाजन गर्दा जुन अवस्थामा पुगेका थिए, त्यही हालत हुँदैछ ।’ 

एमालेबाहेक अन्य कुनै पनि पार्टीले राष्ट्रिय राजनीतिको नेतृत्व गर्न नसक्ने पौडेलले बताए । 

पौडेलले अहिलेको शेरबहादुर देउवा नेतृत्वको सरकारले मुलुक र जनताका लागि केही गर्न नसक्ने बताए । ‘यो इष्र्या र कुन्ठाबाट बनेको सरकार हो,’ नेता पौडेलले भने, ‘३ महिनासम्म मन्त्रिपरिषद्लाई पूर्णता दिन नसक्ने सरकारबाट केही हुँदैन । अघिल्लो सरकारले ल्याएका बजेट र योजना कटौती गरेको छ । योजनाहरू हटाएको छ । अहिले सरकार अगाडि होइन । पछाडि फर्किने काम गरेको छ ।’