अफगानिस्तानमा उग्रवादी समूहहरूलाई रोक्नका लागि सहायता नगर्ने तालिबान अधिकारीहरूले अमेरिकीहरूलाई बताएका छन् ।

अमेरिकाले गत अगस्ट महिनामा अफगानिस्तानबाट हतारहतार बहिर्गमन गरेपछि पहिलोपटक दुई पक्षबीच वार्ता भएको हो । 

अमेरिकी अधिकारीहरू तालिबान प्रतिनिधिहरूलाई भेट्न कतारको राजधानी दोहा पुगेका छन् । उनीहरू विदेशी नागरिकको सुरक्षित बहिर्गमन तथा अतिवादी समूहहरूलाई नियन्त्रणका विषयमा कुराकानी गर्न त्यहाँ पुगेका हुन् । 

तालिबानले बहिर्गमनमा सहयोग गर्ने भने पनि इस्लामिक स्टेट नामक आतंकवादी समूहलाई रोक्नका लागि अमेरिकासँग सहकार्य नगर्ने प्रवक्ता सुहेल शाहीनले बताए । 

गत शुक्रवार गरिएको आत्मघाती आक्रमणमा कम्तीमा ४६ जना शिया मुसलमान मारिएका थिए र १०० भन्दा बढी घाइते भएका थिए । कुन्दुजको मस्जिदमा प्रार्थना गरिरहेका उनीहरूमाथि आक्रमणको जिम्मेवारी आईएसकेपीले लिएको थियो । 

यस्तो हिंसा भए पनि उक्त आतंकवादी समूहलाई आफूहरूले स्वतन्त्र रूपमा कारवाही गर्ने शाहीनले बताए ।