दशैंमा जिल्ला सदरमुकाम सिमकोट अँध्यारो

नेपालीको महान् पर्व दशैंको समयमा हुम्लाको जिल्ला सदरमुकाम सिमकोट अँध्यारो बनेको छ ।

झण्डै १ महिनादेखि अवरुद्ध बनेको विद्युत् सेवा समयमै मर्मत हुन सकेको छैन । सिमकोट र खार्पुनाथ गाउँपालिकामा विद्युत् विस्तार गरेको हेल्दुङ साना जलविद्युत् आयोजनाको नहर गत भदौ २१ गते राति भत्किएपछि स्थानीय अध्याँरोमा दशैं मनाउन बाध्य भएका हुन् ।

अविरल वर्षाका कारण पहिरो गएपछि आयोजनाको नहर भत्किएको थियो । नहर मर्मत गरी १ हप्ता विद्युत् सेवा सञ्चालन गरिए पनि फेरि भत्किएको हो ।

बत्ती नहुँदा ठूलो सास्ती भोग्नुपरेको राज बहादुर बोहराले बताए ।

दशैंको समयमा विद्युत् आपूर्ति बन्द हुँदा वर्षमा १ पटक आउने चाड राम्रोसँग मनाउन नपाएर अध्याँरोमै मनाउन बाध्य भएको बोहराले गुनासो पोखे ।

हुम्लाको विद्युत् प्राधिकरण कार्यालयले मर्मतका नाममा करोडौं रकम खर्च गरे पनि स्थायित्व हुने गरी बनाउन नसकेको हो । गत वर्ष समेत हुम्लीले अँध्यारोमा दशैं मनाएका थिए भने यस वर्ष समेत अध्यारोमा मनाउन बाध्य भएका छन् ।