नेकपा एमालेका अध्यक्ष केपी शर्मा ओलीले कांग्रेस सभापति शेरबहादुर देउवालाई प्रधानमन्त्री बनाउन परमादेश जारी गर्ने पाँचै जना न्यायाधीशले राजीनामा गर्दा उपयुक्त हुने टिप्पणी गरेका छन् ।

सर्वोच्च अदालतका प्रधानन्यायाधीश चोलेन्द्र शमशेर जबराको राजीनामा माग गर्दै न्यायाधीशहरूले गरेको अवज्ञालाई तमासाको संज्ञा दिए । 

नेकपा एमालेको पालिका अधिवेशन उद्‍घाटनलाई मंगलवार दिउँसो सम्बोधन गर्दै ओलीले परमादेश जारी गरेर देशलाई यो हालतमा पुर्‍याउने पाँचै जनाले राजीनामा गरे उपयुक्त हुने टिप्पणी गरेका हुन् । उनले तमासा नदेखाउन र अदालतलाई मर्यादित बनाउन आग्रह गरे । 

‘सर्वोच्च अदालतमा आफैं तमासा देखिएको छ, श्रीमान् न्यायाधीशहरू आफैं आन्दोलनमा हुनुहुन्छ । परमादेश त एक जनाले होइन, पाँचै जनाले गर्नुभएको थियो होला । पाँचै जनाले राजीनामा गरे उपयुक्त होइन र ?’ ओलीले भने, ‘पाँचै जना न्यायाधीशको सर्वसहमतिमा आएको फैसलाको सुगन्ध या दुर्गन्ध के फैलिएको छ अहिले म भन्न चाहन्न । सर्वोच्च अदालतको मानमर्दन यहाँहरूले गरिरहनुभएको छ । यो न्यायधीश राख्छु, यो राख्दिनँ भन्ने, बारले इजलास गठन गर्ने जस्ता अभ्यासहरू ... म कानून व्यवसायी होइन । कानून व्यवसायीले त कानूनमा भएको कुरा देख्नुपर्ने हो ।’

सम्बोधनको क्रममा ओलीले भने, ‘राष्ट्रपतिमाथि परमादेश जारी गर्ने । तपाईंहरू अहिले पोल खोलाखोल गर्दै हुनुहुन्छ । मेरो चिन्ता लोकतन्त्र जित्नु पर्दछ, हाम्रो न्याय प्रणाली पारदर्शी हुनुपर्दछ ।’

ओलीले जनताको न्यायको भरोसाको केन्द्र रहेको अदालत नक्कली मुद्दा खडा गरेर राजनीतिको थलो बनिरहेको टिप्पणी गरे । ‘अदालतलाई मर्यादित बनाऔं, तमासाको थलो बन्न नदिऔं, मेरो आग्रह छ,’ ओलीले भने ।