नेकपा एमालेका सचिव तथा पूर्व मन्त्री प्रदीप ज्ञवालीले आगामी निर्वाचनबाट परमादेश सरकारलाई जनादेशले जवाफ दिने बताएका छन् । 

नेकपा एमाले रेसुङ्गा नगर कमिटी गुल्मीको प्रथम अधिवेशनलाई सम्बोधन गर्दै उनले एमाले नेतृत्वको सरकारलाई परमादेश गर्ने सरकार बिटुलो भएको बताए ।

उनले एमाले सरकारलाई परमादेश गर्ने न्यायालय अहिले आफैं बिटुलो बनिरहेको बताए । ‘सरकार मात्रै होइन, न्यायालय उदांगो बनेको छ । आसेपासेसँगै न्यायाधीशको कोटामा पनि मन्त्री ! कार्यपालिका र न्यायालयको अपवित्र सम्बन्ध पनि छरपस्ट भयो,’ उनले भने, ‘फेरि पनि जनताले एमाले खोजिरहेका छन्, गाउँगाउँमा पुग्छौं ।’

चौतर्फी घेराबन्दीले केही दिन प्रतिपक्ष र पार्टीको आन्तरिक जीवनमा केही समस्या आए पनि उच्चस्तरीय सम्झादारी सहितका सर्वसम्मत कमिटीहरू बनाएर काम अगाडि बढाए २ दिनका पाहुना एमालेमै फर्कन धेरै समय नलाग्ने ज्ञवालीले बताए ।

जनताको जनादेशविरुद्ध दल, अदालत, निर्वाचन आयोग र सभामुख जस्ता संस्था घेरिए पनि पार्टी एकढिक्का बनाएर सर्वसम्मत कमिटी निर्माणसँगै संगठन गतिशील बनाउन, पार्टीका विचार र सिद्धान्त जनतामाझ पुर्‍याएर नागरिकसँगको सम्बन्ध थप सुदृढ बनाउन ज्ञवालीले जिल्ला स्तरीय नेता तथा कार्यकर्तालाई निर्देशन दिए । ७ दशकको आन्दोलनको उपलब्धि संस्थागत गर्नेदेखि देशका ठूला लडाइँमा अगुवाइ गर्ने एमालेले अब पनि स्थायित्व र समृद्धिको अगुवाइ गर्नसक्ने हिम्मत राख्ने ज्ञवालीले बताए । 

ज्ञवालीले छुट्टै देश बनाउँछु भन्ने सीके राउत, युद्धको नेतृत्व गर्ने विप्लपसँगै संविधान जलाउन तछाँडमछाँड गर्ने मधेशवादी दललाई शान्ति र संविधानको मूलधारमा ल्याउनेदेखि लिपुलेक र कालपानी सहितको नक्सा छाप्ने सरकार रहेका बेला १५ वर्ष पार्टीको नेतृत्व गरेका माधव नेपाल सहितको अगुवामा प्रतिपक्ष बन्नु निकै विडम्बनाको विषय भएको बताए ।