चीनले द्रुत गतिमा आणविक हतियार बढाइरहेको अमेरिकाको रक्षा मन्त्रालय पेन्टागनले बुधवार जनाएको छ । 

सन् २०३० सम्म उसले एक हजार आणविक हतियारको लक्ष्य हासिल गर्न सक्ने पेन्टागनको अनुमान छ । हालैको समयमा चीनले नाटकीय रूपमा आणविक हतियार बढाएको छ । 

अमेरिकासँग ३७ सय ५० वटा आणविक हतियार छन् तर उसले यसको संख्या बढाउने सोच राखेको छैन । 

अमेरिकी संसद् कंग्रेससमक्ष एक प्रतिवेदन बुझाउँदै पेन्टागनले अर्को दशकसम्ममा चीनले आणविक हतियारको आधुनिकीकरण तथा विस्तार गर्ने जनाएको छ । चीनले स्थल, समुद्र र वायु आधारित आणविक हतियार डेलिभरी प्लेटफर्मको संख्या विस्तार गरिरहेको छ । उसले आणविक हतियार विस्तारका लागि आवश्यक आधारभूत संरचना बनाइरहेको छ । 

चीनले कम्तीमा तीनवटा अन्तर्महादेशीय ब्यालिस्टिक क्षेप्यास्त्र साइलोको निर्माण शुरू गरेको पनि पेन्टागनको प्रतिवेदनमा उल्लेख छ । 

चीनले हतियारको संख्या द्रुत गतिमा बढाइरहेको भए पनि उसको भण्डार रुस र अमेरिकाको तुलनामा सानो छ ।