मुख्यमन्त्री केसीले गरे रोल्पामा अक्सिजन प्लान्टको उद्घाटन

लुम्बिनी प्रदेशका मुख्यमन्त्री कुलप्रसाद केसीले रोल्पामा अक्सिजन प्लान्टको उद्घाटन गरेका छन् ।

रोल्पा अस्पतालमा शुक्रवार आयोजित एक कर्यक्रममा अक्सिजन प्लान्टको उद्घाटन गरिएको हो ।

संघीय सरकारको ७५ लाख रुपैयाँ बजेटबाट जडान गरिएको प्लान्टले दैनिक २५ भन्दा बढी सिलिन्डर उत्पादन गर्नसक्ने क्षमता रहेको छ । 

जिल्लामा खपत भएर बचेको अक्सिजन जिल्ला बाहिर निर्यात गर्न सकिने बताइएको छ । अक्सिजन प्लान्ट जडानसँगै रोल्पाको स्वास्थ्य क्षेत्रमा नयाँ आयाम थपिएको मुख्यमन्त्री केसीले बताए । ‘अब अक्सिजनको अभावमा रोल्पालीले ज्यान गुमाउन पर्ने छैन,’ मुख्यमन्त्री केसीले भने । 

जिल्लाको स्वास्थ्य सेवाका लागि प्रदेश सरकारले उपलब्ध गराएका दरबन्दीलाई निरन्तरता दिइने मुख्यमन्त्री केसीको भनाइ छ । स्वास्थ्य सेवामा पछाडि परेको रोल्पामा अन्य सेवा पनि निरन्तर थप गर्न पहल गर्ने उनले बताए ।

मुख्यमन्त्री केसीले शुक्रवारै सीता महरा स्मृति पार्कको समेत उद्घाटन गरे । पूर्व सभामुख कृष्णबहादुर महराको पत्नी सीताको स्मृतिमा रोल्पा नगरपालिका–१ मेवाङमा पार्क बनाइएको छ । 

पार्क उद्घाटन कार्यक्रममा मुख्यमन्त्री केसीले सीताले बालबच्चा बोकेर जनयुद्धमा सहभागी भएको स्मरण गरे । तत्कालीन राज्यसत्ताले घरमा बस्न नदिएपछि महराको सपरिवार जनयुद्धमा सहभागी भएको थियो । सीता महराको अघिल्लो वर्ष निधन भएको थियो ।

सीता महरा स्मृति फाउन्डेशनद्वारा आयोजित पार्क उद्घाटन कार्यक्रमको सभापतित्व सीताका पति समेत रहेका पूर्व सभामुख महराले गरेका थिए । पार्क संघीय सरकारको ३० लाख रुपैयाँ बजेटमा निर्माण गरिएको हो ।