वरिष्ठ अधिवक्ता सुरेन्द्र महतोले प्रधानन्यायाधीश चोलेन्द्रशमशेर जबराको पदमुक्ति नभएसम्म बारको आन्दोलन जारी रहने बताएका छन् । 

सर्वोच्च अदालतको मूल गेटमा दुई घण्टाको धर्नापछि बारको प्राङ्गणमा आयोजित विरोध सभालाई सम्बोधन गर्दै महतोले बारको आन्दोलन जनताको अधिकार, संविधानको रक्षा र राष्ट्रहितको लागि भएको बताएका हुन् । 

आफूले गैर संवैधानिक ढंगले पद नत्याग्ने जबराको भनाइप्रति लक्षित गर्दै महतोले भने, ‘दीपकराज जोशीको बेञ्च खोस्ने काम कुन विधि अन्तरगत भएको थियो ?’ महतोले बारको आन्दोलन छिट्टै सफल भएरै छाड्ने दाबी गरे । 

‘न्यायपालिका र कार्यपालिकाको सीमा रेखा समाप्त गरेर, कार्यपालिकाको गरिमा घटाउने प्रधानन्यायाधीशले अदालत छाड्नै पर्छ,’ महतोले भने, ‘न्यायपालिका अप्रेसन थिएटरमा छ, न्यायपालिकाको मर्यादा भंग गर्न लागेको अंगलाई काटेर हटाउन लागिएको हो । हामी फेरि पनि न्यायपालिकाको गरिमा बढाउँछौँ, कार्यपालिका हस्तक्षेपविहीन न्यायपालिका बनाउँछौँ ।’ 

महतोले सशस्त्र प्रहरीका पूर्व डीआईजी रञ्जन कोइरालाको मुद्दामा प्रधानन्यायाधीशले मन्त्री, सीडीओ र कारागार प्रमुखको रुपमा कारागार कानूनको प्रयोग गरेको आरोप लगाए । ‘सीडीओ बन्न त अब उमेरले दिँदैन, गृहमन्त्री बन्ने मन भए चुनाव लडेर गृहमन्त्री बन्न गए हुन्छ हामी अवरोध गर्दैनौँ,’ महतोले भने ।