गोलाप्रथाको नियमावली र कार्यविधि स्वीकृत गर्न बिहीबार फुलकोर्ट(सर्वाेच्चका न्यायाधीशकाे पूर्ण बैठक) बस्ने भएको छ । सर्वोच्च अदालतका न्यायाधीशहरुबीच बुधबार बसेको बैठकमा गोलाप्रथासम्बन्धी नियमावली र कार्यविधिको प्रावधानप्रति सहमति जुटेको हो ।
सर्वोच्च अदालतका एक न्यायाधीशले नियमावली र  कार्यविधिमा सहमति जुटेको लोकान्तरलाई बताए । ‘सबै बुँदामा दफाबार छलफल भएर कार्यविधि र नियमावलीको कन्टेन्टमा सहमति जुटेको छ’, उनले भने, ‘भोलि फुलकोर्ट बसेर अनुमोदन हुन्छ ।’ फुलकोर्टबाट नियमावली र कार्यविधि स्वीकृत भएपछि त्यसलाई राजपत्रमा प्रकाशनका लागि पठाइनेछ ।

आजको बैठकमा यसअघि कित्ता परिवर्तन गरेर प्रधानन्यायाधीश चोलेन्द्र शमशेर जबराको कित्तामा पुगेका भनिएका न्यायाधीशहरुको पनि सहभागिता रहेको थियो । एक बिदामा रहेका न्यायाधीशबाहेक बैठकमा १८ जना न्यायाधीशको सहभागिता रहेको थियो भने नेपाल बार एसोसिएसनको आन्दोलनअनुसार नै अघि बढ्ने विषयमा पनि सहमति भएको छ । जसअनुसार प्रधानन्यायाधीश जबराले राजीनामा दिनुपर्ने नै पक्षमा उनीहरु उभिएका छन् भने उनीसँग कुनै पनि हालतमा बेन्च सेयर नगर्ने समझदारी भएको छ ।

थप समाचार

EXCLUSIVE : गोलाप्रथाबाट मुद्दाको पेशी तोक्ने कार्यविधि तयार, फुलकोर्ट बैठकपछि सबै न्यायाधीश इजलासमा फर्किने

न्यायाधीशहरूका अनुसार कार्यविधिमा एकल इजलास, संयुक्त इजलासदेखि सबै इजलास र सबै मुद्दाको गोला तान्ने र गोला तान्दा जे पर्छ त्यसैमा सुनुवाइ गर्ने विषय उल्लेख छ । न्यायाधीशहरु मीरा खड्का, आनन्दमोहन भट्टराई, प्रकाश ढुंगाना, हरि फुयाल र नहकुल सुवेदी सम्मिलित कार्यदलले मंगलबार गोलाप्रथाबाट मुद्दाको पेशी तोक्ने कार्यविधि तयार तयार गरेको थियो ।

यो कार्यविधि पास भएपछि दशकौँदेखि प्रधानन्यायाधीशले इजलास तोक्ने परम्पराको अन्त्य हुनेछ भने न्यायाधीशहरु स्वयंले गोला झिकेर इजलासमा बस्न पाउनेछन् ।