नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमालेलाई लक्षित गर्दै पार्टी तीन टुक्रा बनाउनेले पनि महाधिवेशनको नाम एकता महाधिवेशन राखेको भन्दै व्यङ्ग्य गरेका छन् । 

राष्ट्रिय प्रजातान्त्रिक पार्टीको एकता महाधिवेशनलाई सम्बोधन गर्दै प्रचण्डले राप्रपाका तीन नेताहरू मिलेर एकताको महाधिवशेन गरेको तर, एमालेले पार्टी फुटाएर एकता महाधिवेशन भनेको बताए । 

‘तपाईंहरू तीन जना नेता मिलेर एकताको महाधिवेशन गर्नुभयो । काम जस्तै नाम राखेर एकताको महाधिवेशन गर्नुभयो । तर, यहाँ पार्टी फुटाएर तीन टुक्रा बनाउने तर नाम चाहिँ एकता महाधिवेशन राख्ने काम पनि भर्खरै भयो,’ प्रचण्डले भने । 

नेकपा एमालेको महाधिवेशनमा अतिथिको निम्तोमा नगएका प्रचण्ड राप्रपाको महाधिवेशनमा गएर सम्बोधन गरेका छन् ।

राप्रपासँग आफ्नो विचार र मत नमिल्ने तर, राष्ट्रियताको भाषा मिल्ने भएकाले गोत्र चाहिँ मिल्ने प्रचण्डले बताए ।  

‘म गणतन्त्रवादी, धर्मनिरपेक्षतावादी हुँ तर, तपाईंहरूजस्तै राष्ट्रवादी चाहिँ हो,’ प्रचण्डले भने ।

सम्बोधनको क्रममा प्रचण्डले राप्रपाको महाधिवेशन सफलताको शुभकामना दिए ।