रक्तचन्दनको काठ पेलेर तेल निकाल्न वन कार्यालयलाई ‘महाभारत’ !

प्रहरीले रक्तचन्दनको तेल भन्दै बरामद गरेको तरल पदार्थको वास्तविकता पुष्टि गर्न डिभिजन वन कार्यालय काठमाडौंलाई हम्मेहम्मे परेको छ ।

महानगरीय प्रहरी अपराध महाशाखाले २ पटक गरेर ७७ लिटर ‘रक्तचन्दनको तेल’ भनिएको तरल पदार्थ वन कार्यालयलाई बुझाएको थियो ।

वन कार्यालयका प्रवक्ता सहायक वन अधिकृत शिवराम थापाका अनुसार रक्तचन्दनको तेल कसरी निकालिन्छ भन्ने परीक्षण भइरहेको छ । 

कार्यालयले रक्तचन्दनको काठलाई बफ्याएर त्यसबाट तरल पदार्थ निकाल्ने प्रयास गर्न लागेको छ ।

‘हामीले रक्तचन्दनको काठबाट तेल कसरी निकालिन्छ भन्ने परीक्षण गर्न लागेका छौं,’ प्रवक्ता थापाले लोकान्तरसँग भने, ‘यदि निक्लेको खण्डमा त्यो पुष्टि हुन्छ ।’

काठबाट तेल निस्केको खण्डमा र बरामद भएको तरल पदार्थसँग मेल खाएमा मात्र त्यसको पुष्टि हुनेछ ।

तर, यसरी गरिने परीक्षणमा पनि शंका रहने वन कार्यालयकै एक अधिकृत बताउँछन् ।

‘हामीसँग परीक्षण गर्ने कुने मशिन छैन । काठबाट तेल कसरी निस्कन्छ र, त्यो त झारा टार्ने बाटो मात्रै हो,’ ती अधिकृतले लोकान्तरसँग भने, ‘त्यसरी परीक्षण गर्दाको विश्वशनीयता कति हुन्छ भन्ने अदालतले प्रश्न उठाउने ठाउँ  हुन्छ, मुद्दा कमजोर हुन्छ ।’

तेल भनिएको वस्तु रक्तचन्दनको सुगन्ध आउने केमिकल पनि  हुन सक्ने भएकाले त्यसलाई मेसिनविना प्रमाणित गर्न खोज्नु कमजोरी भएको उनको भनाइ छ । 

महानगरीय प्रहरी अपराध महाशाखाले कात्तिक ८ गते बूढानीलकण्ठ नगरपालिका– ५ बाट ४४ लिटर रक्तचन्दनको तेल भनिएको तरल पदार्थसहित २ जनालाई पक्राउ गरेको थियो । 

पक्राउ पर्नेमा रामेछाप उमाकुण्ड गाउँपालिका–४ का २७ वर्षीय रामबहादुर खत्री र कास्कीको पोखरा लेखनाथ महारपालिका– १० स्थायी ठेगाना भई बूढानीलकण्ठ नगरपालिका– ५ बस्ने ४० वर्षका गंगाबहादुर पुन थिए । 

उक्त तरल पदार्थ भारतबाट नेपालगञ्जको सीमा नाका हुँदै काठमाडौं र काठमाडैंबाट चीन तस्करी हुन लागेको अनुसन्धानमा खुलेको अपराध महाशाखाका प्रवक्ता प्रहरी उपरीक्षक (एसपी) कृष्णप्रसाद कोइरालले बताए ।

प्रहरीले कात्तिक ९ गते काठमाडौंको तिलगंगा आँखा अस्पतालपछाडि प्रतिलिटर ५ लाखका दरले बिक्री हुँदै गर्दा ३३ लिटर रक्तचन्दनको तेलसहित थप १० जनालाई पक्राउ गरेको थियो । 

त्यतिबेला सिन्धुली हरिहरपुर गाउँपालिका–४ का ५० वर्षीय हेमकुमार श्रेष्ठ, मकवानपुर गढी गाउँपालिका–१ का ३९ वर्षीय मंगल सिंह लो, काठमाडौं टोखा नगरपालिका– ४ का ३७ वर्षीय इक्रम श्रेष्ठ, काभ्रे बनेपा नगरपालिका–४ का ३१ वर्षीय कार्साङ्ग लामा, खोटाङ हलेसी नगरपालिका–६ का २३ वर्षीय घनश्याम आलेमगर, काठमाडौं महानगरपालिका–८ का ५१ वर्षीय मदन पोडे, खोटाङ हलेसी नगरपालिका– ९ का २० वर्षीय जीवन थापा, तनहुँ भानू नगरपालिका–६ का २५ वर्षीय सुदीप थडराई, काठमाडौं १३ छाउनीका ५१ वर्षीय अनुपकुमार श्रेष्ठ र ५३ वर्षीय अनिलचरण श्रेष्ठलाई पक्राउ परेका थिए ।

उनीहरूले पनि भारतीय सीमा नाका हुँदै नेपाल ल्याएर चीनतर्फ तस्करी गर्न लागेको बयान दिएका थिए । 

अपराध महाशाखाका प्रवक्ता एसपी कृष्णप्रसाद कोइरालाका अनुसार ठगी गर्ने उद्देश्यले किनबेच भएको हुनसक्ने आशंका पनि छ ।

‘हामीले रक्तचन्दनको तेल हो भनेर महंगोमा किनबेच हुन लागेको थाहा पाएपछि पक्राउ गरेका हौं,’ एसपी कोइरालाले लोकान्तरसँग भने, ‘उनीहरूले यसलाई ठगी गर्ने उद्देश्यले किनबेच गर्न लागेको पनि हुनसक्ने देखिन्छ ।’

अनुसन्धानमा खटिएका प्रहरी अधिकारीका अनुसार चीनमा अत्तर (पर्फ्युम) बनाउन प्रयोग हुने भएकाले भारतबाट चीनतर्फ रक्तचन्दन तस्करी हुने गरेको छ ।

‘तस्करी गर्नेको भनाइलाई मान्ने हो भने चीनमा तेलको महँगो पर्फ्युम बन्ने गरेको छ । भारतमा सस्तोमा रक्तचन्दन पाइने भएकाले त्यहाँबाट नेपालको बाटो हुँदै चीनतर्फ तस्करी हुने गरेको छ,’ ती अधिकारीले लोकान्तरसँग भने । 

यसभन्दा अगाडि नेपालबाट भारततर्फ र भारतबाट नेपालतर्फ रक्तचन्दनको काठ र धूलो तस्करी हुने गरेको थियो । नेपालमा रक्तचन्दनको तेल भनिएको तरल पदार्थ बरामद भएको भने पहिलोपटक हो ।