जिल्ला प्रहरी कार्यालय रामेछापले २८ वर्षपछि कर्तव्य ज्यान मुद्दाका फरार अभियुक्तलाई पक्राउ गरेको छ । 

पक्राउ पर्नेमा साविक गौश्वारा गाविस-७ (हाल दोरम्बा शैलुङ गाउँपालिका–४) का ५८ वर्षीय होमबहादुर थापामगर रहेको जिल्ला प्रहरी कार्यालय रामेछापका प्रमुख प्रहरी नायव उपरीक्षक नवराज ढुंगानाले बताए ।

प्रहरीका अनुसार उनीसमेत चार जनाले २०४९ कात्तिक ५ गते छिमेकी गजुरे मगरलाई विवादका कारण चक्कु प्रहार गरी हत्या गरेर फरार थिए ।

होमबहादुरबाहेक अन्य तीन अभियुक्तमध्ये चन्द्रबहादुर मगर र गंगबहादुर मगरले कैद सजाय भुक्तान गरिसकेका छन् भने टकबहादुर मगरको मृत्यु भइसकेको छ । 

डीएसपी ढुंगानाका अनुसार कर्तव्य ज्यान मुद्दामा जिल्ला अदालत रामेछापको २०५० फागुन १६ गतेको फैसलाअनुसार २० वर्ष कैद सजाय तोकिएका थापामगर हालसम्म फरार थिए । प्रहरीले विशेष सूचनाको आधारमा मगरलाई आफ्नै घरभित्र डोकोमा लुकेर बसेको अवस्थामा पक्राउ गरेको हो । 

उनको श्रीमतीले घरमै भएका श्रीमान होमबहादुरको बारेमा विभिन्न झुक्यानमा पारी भगाउन खोज्दै गर्दा प्रहरीले खोजतलासको क्रममा आफ्नै घरको मााथिल्लो तलामा डोकोभित्र लुकेर बसेको अवस्थामा फेला परेको हो । 

अभियुक्तलाई मंगलवार नै जिल्ला अदालत पेश गरिने प्रहरीले जनाएको छ ।