नेकपा (माओवादी केन्द्र)को आठौं राष्ट्रिय महाधिवेशनअन्तर्गत आजको बन्दसत्रले पार्टीको विधान पारित गरेपछि केहीबेरका लागि स्थगित भएको छ ।

महाधिवेशनले अब पार्टीको केन्द्रीय कमिटी निर्वाचित गर्न बाँकी छ । केन्द्रीय कमिटी चयनका लागि छलफल गर्न माओवादी केन्द्रको स्थायी कमिटी बैठक महाधिवेशनस्थल प्रज्ञा प्रतिष्ठानमा बसिरहेको छ । 

आज बिहान पनि स्थायी कमिटी बैठकमा पार्टीको विधान र केन्द्रीय कमिटी चयनबारे नेताहरूले छलफल गरेका थिए । 

आजको बन्दसत्रबाट पारित विधानअनुसार केन्द्रीय कमिटीले पदाधिकारी निर्वाचित गर्नेछ । माओवादी केन्द्रको १५ जना पदाधिकारी सहित २९९ जना सदस्य रहेको केन्द्रीय कमिटी हुने व्यवस्था गरेको छ ।  

पुस ११ बाट शुरू भएको महाधिवेशनको आज सातौं दिन हो । महाधिवेशनको बन्दसत्रमा अध्यक्ष पुष्पकमल दाहाल प्रचण्डले पेश गरेको '२१ औं शताब्दीमा समाजवादको नेपाली बाटो' शीर्षकको प्रतिवेदन छलफल पछि पारित भएको छ ।