एमाले तेह्रथुम अध्यक्षमा दुई प्रदेश सांसद भिड्दै

नेकपा (एमाले) तेह्रथुमको अध्यक्षमा दुई प्रदेश सांसदबीच प्रतिस्पर्धा हुने भएको छ । प्रदेश सांसदहरू लक्ष्मण तिवारी र तेजमान कन्दङवाले उम्मेदवारी घोषणा गरेका छन् । 

६ वटा पालिका रहेको तेह्रथुममा प्रतिनिधि भने सर्वसम्मत चयन भएका छन् । तिवारी बहालवाला अध्यक्ष हुन् भने कन्दङवा पूर्व अध्यक्ष हुन् । 

तिवारी १० बुँदे सहमतिमार्फत् एमालेमा बसेका थिए भने कन्दङवा शेरधन राईलाई संसदीय दलको नेतामा समर्थन गर्दै केपी ओली समूहमा प्रवेश गरेका थिए । उनी जिल्ला अध्यक्ष हुँदा तिवारी सचिव थिए । तिवारी नेता योगेश भट्टराई निकटका हुन् । 

नयाँ नेतृत्व छान्नका लागि सर्वसम्मतको प्रयास जारी राखिएको एमाले तेह्रथुमका नेता गोविन्दराज श्रेष्ठले बताए । सर्वसम्मत नेतृत्व चयन नभए भोलि (शनिवार) बिहानदेखि निर्वाचनको प्रक्रिया अगाडि बढाइने निर्वाचन समिति संयोजक तीर्थ कट्वालले बताए । सर्वसम्मतको छाँटकाट नदेखिएपछि मतपत्र छपाइको तयारी थालिएको उनले बताए । 

जिल्ला अधिवेशनबाट ८५ जना भूगोलतर्फ र ५ जना पदाधिकारीहरू निर्वाचित हुने भएका छन् । 

अधिवेशनका लागि ६ वटै पालिकाबाट ५५० प्रतिनिधि छनोट भएका छन् ।