भौतिक पूर्वाधार तथा यातायात मन्त्री रेणु यादवले हिंसा भड्काउने खालको आपत्तिजनक अभिव्यक्ति दिएकी छिन् ।

बुधवार रौतहटमा आयोजित कार्यक्रममा जनता समाजवादी पार्टी (जसपा)की नेतृ यादवले जनमत पार्टीका नेता डा. सीके राउतप्रति लक्षित गर्दै हत्या हुन सक्ने धम्की दिएकी हुन् । 

रौतहटको गौरमा बुधवार बलिदानी दिवसको अवसरमा आयोजित कार्यक्रममा मन्त्री यादवले गौरको राइस मिल काण्ड दोहोरिन सक्ने बताएकी हुन् । २०६३ सालमा तत्कालीन मधेशी जनअधिकार फोरम र माओवादी कार्यकर्ताबीच हिंसात्मक झडप हुँदा माओवादीका २८ कार्यकर्ता मारिएका थिए ।

‘तुफानसँग टकराव गर्ने प्रयास गर्दा तपाईको त्यही हालत होला, जुन गौरको राइस मिलमा भएको थियो । म डाक्टर साब (सीके राउत)लाई भन्छु, त्यो इतिहास नभुलुन् । तपाईंका कार्यकर्ता पनि मारिन सक्छन्, सतर्क रहनुस्,’ यादवले भनिन् । हिन्दीमा सम्वोधन गरेकी उनले डाक्टरलाई कदर गर्ने भन्दै सीके राउतको नाम उच्चारण गरिनन् । 

मन्त्री यादवले लाठी भाँच्छ आफ्ना कार्यकर्ताले पनि जानेको भएपनि बलिदानी दिवसको अवसरमा हिंसा नगर्ने भन्दै झडप नगर्ने बताइन् । 

मन्त्री यादवको अभिव्यक्तिप्रति राउतले आपत्ति जनाएका छन् । ‘किसानले मलखाद माग्दा मन्त्रीजीद्वारा अर्को गौर नरसंहार घटाउने र डा.सी.के. राउतको हत्या गर्ने धम्की ? किसान आन्दोलन– जिन्दाबाद !’ मन्त्रीको अभिव्यक्तिको भिडियो शेयर गर्दै राउतले ट्वीटरमा लेखेका छन् । 

रासायनिक मलको माग गर्दै सीके राउतको पार्टीले तराईका जिल्लामा आन्दोलन गरेका छ । त्यसक्रममा जसपाका मन्त्रीहरुलाई ठाउँ ठाउँमा विरोध गर्दै आएको छ । 

हिंसा भड्काउने खालको अभिव्यक्ति दिएको भन्दै नेत्री यादवको चौतर्फी विरोध भएको छ ।