नेपाली कांग्रेसका वरिष्ठ नेता तथा सरकार सञ्चालनका लागि गठित उच्चस्तरीय राजनीतिक संयन्त्रका संयोजक रामचन्द्र पौडेलले वैशाखमा चुनाव गर्न सम्भव नभएकाले अब जेठमा चुनाव हुनुपर्ने बताएका छन् ।

अहिलेको कानून अनुसार वैशाखमा नभई चैत्रको ४ अगावै चुनाव गर्नुपर्ने उनको तर्क छ । 

प्रधानमन्त्री निवास बालुवाटारमा शनिवार बसेको उच्चस्तरीय संयन्त्रको बैठकले जेठभित्र चुनाव गर्ने गरी मिति तोक्न सरकारलाई सिफारिश गरेको थियो ।

संयन्त्रको बैठकपछि लोकान्तरसँग कुरा गर्दै संयोजक पौडेलले वैशाखमा चुनाव गर्न अब सम्भव नहुने बताए ।

‘वैशाखमा त अब भ्याउँदा पनि भ्याउँदैन । अहिलेको कानून अनुसार गर्ने हो भने त चैत ४ गते चुनाव गर्नुपथ्र्यो,’ पौडेलले लोकान्तरसँग भने, ‘निर्वाचन आयोगले सरकारलाई १० चोटी घाटी समातेर चुनाव घोषणा गर भनेर वैशाख १४ र २२ गतेको मिति कसरी भन्यो ? चैत्रको ४ गते अगावै किन भनेन ?’ 

नेता पौडेलले वैशाखमै चुनाव गर्नुपर्ने संविधानको बाध्यकारी व्यवस्था नभएको जिकिर गरे । यसअघि गठबन्धनले वैशाखमा नभई असोजपछि स्थानीय तहको चुनाव गर्ने बताउँदै आएको थियो । 

चौतर्फी दबाबपछि गठबन्धन स्थानीय तहको चुनाव निर्धारित समयमै गर्ने निष्कर्षमा पुगेको छ । शनिवार बसेको संयन्त्रको बैठकमा प्रधानमन्त्री समेत रहेका कांग्रेस सभापति शेरबहादुर देउवाले स्थानीय तहको चुनाव जेठ महिनामा गर्न प्रस्ताव गरेका थिए । 

२०७४ सालमा सम्पन्न स्थानीय तहको पहिलो चरणको निर्वाचन भई पदाधिकारीले कार्यभार सम्हालेको जेठ ५ गतेलाई आधार बनाएर त्यो अगावै चुनाव गर्न निर्वाचन आयोगले प्रस्ताव गरेको थियो ।

आयोगले वैशाख १४ र २२ गतेका लागि स्थानीय तहको चुनाव गर्न प्रस्ताव गरे पनि सरकारले मिति घोषणामा ढिलाइ गरेको छ । 

निर्वाचन आयोगसँगको परामर्शमा सरकारले केही दिनमै स्थानीय तह निर्वाचनको मिति घोषणा गर्ने सहमति गठबन्धनमा भएको अर्का एक नेताले जानकारी दिए । सरकारका प्रवक्ता समेत रहेका सञ्चारमन्त्री ज्ञानेन्द्रबहादुर कार्कीले पनि जेठ महिनाभित्र स्थानीय तहको निर्वाचन गर्न गठबन्धनले सरकारलाई सुझाव दिएको जानकारी दिए ।