सत्ता गठबन्धनका मुख्य साझेदार नेकपा माओवादी केन्द्र र नेकपा (एस)ले एमसीसी पास गर्न गठबन्धन तोड्न लागेको हो भनेर प्रधानमन्त्री शेरबहादुर देउवासँग प्रश्न गरेका छन् । 

प्रधानमन्त्री एवं नेपाली कांग्रेसका सभापति देउवासँग बुधवार माओवादी अध्यक्ष पुष्पकमल दाहाल ‘प्रचण्ड’ र नेकपा (एस)का अध्यक्ष माधव नेपालले एमसीसी पास गर्न गठबन्धन तोड्न लागेको हो भनेर प्रश्न गरेका हुन् । 

देउवालाई भेट्न प्रचण्ड र नेपाल बुधवार मध्यान्ह बालुवाटार पुगेका थिए । भेटमा मुख्यतः एमसीसी अनुमोदनमा देउवाको अतिरिक्त सक्रियताबारे प्रचण्ड र नेपालले चासो राखेका थिए । जवाफमा देउवाले गठबन्धन तोड्ने कुनै मनसाय नरहेको प्रतिक्रिया जनाएको नेकपा (एस) स्रोतले जानकारी दियो । 

बालुवाटारबाट निस्केर पार्टी निकट अखिलको कार्यक्रममा सहभागी भएका नेता नेपालले कुनै पनि हालतमा गठबन्धन नटुट्ने दाबी गरेका छन् । गठबन्धन तोडिए पनि एमसीसी अनुमोदन हुने भन्ने समाचारबारे आफूहरूबीच छलफल भएको नेता नेपालले बताए ।  

‘दिनदिनै पत्रिकामा आएका कुरालाई लिएर चिन्ता गर्नुपर्ने छैन । गठबन्धन टुट्नेवाला छैन, कसैले टुटाउन खोजे पनि टुट्नेवाला छैन,’ नेता नेपालले भने, ‘नेपाल सरकारका प्रधानमन्त्री शेरबहादुर देउवाजी र माओवादी केन्द्रका अध्यक्ष प्रचण्डजी म आफैं तीनैजना बसेर छलफल गर्‍यौं । पत्रपत्रिकामा आएका समाचारको बारेमा छलफलमा चलायौँ, मनगढन्ते कुरा आएका छन् । गठबन्धनलाई बलियो बनाएर लैजाने कुरा गरेका छौं ।’

यथास्थितिमा एमसीसी अनुमोदन गर्न नसकिने प्रचण्ड र नेपालले अडान राख्दै आएका छन् । गठबन्धन तोड्ने शर्तमा एमसीसीमा सघाउन एमाले तयार रहेको चर्चाका बीच नेता नेपालले गठबन्धन नटुट्ने दाबी गरे । 

‘कसैले चाहना राखेको होला, गठबन्धन तोड्नुस् साथ दिन्छु भनेका होलान् । गलत मनसाय सफल हुन दिँदैनौँ,’ नेता नेपालले विद्यार्थीहरूको कार्यक्रममा भने । 

स्रोतका अनुसार तीन शीर्ष नेताबीच जेठ ४ गते स्थानीय तहको चुनाव गर्ने गरी मन्त्रिपरिषद्बाट भोलि मिति तोक्ने सहमति भएको छ । 

बालुवाटारको छलफलअघि गृहमन्त्री बालकृष्ण खाणले नेता नेपालसँग उनको निवास कोटेश्वरमा भेटवार्ता गरेका थिए ।