लगानी बोर्डले करीब २३ अर्ब रूपैयाँ लागत अनुमान गरेको दुई सौर्य ऊर्जा परियोजना निर्माण गर्न सम्भाव्यता अध्ययन गराउने निर्णय गरेको छ । 

बोर्डले बुट मोडलमा तल्लो अरुण बनाउने प्रस्ताव पनि सोही बैठकबाट स्वीकृति गरेको छ । 

प्रधानमन्त्री तथा लगानी बोर्डका अध्यक्ष शेरबहादुर देउवाको अध्यक्षतामा मंगलवार बसेको लगानी बोर्डको ४९ औं बैठकले सुदूरपश्चिमको डोटी र डडेलधुरामा निर्माण गर्ने यी दुई आयोजनाको लागि सेन्टर इलेक्ट्रोनिक्स लिमिटेडलाई सम्भाव्यता अध्ययन गर्न अनुमति दिने निर्णय गरेको हो । 

निर्माणाधीन यी दुई सौर्य ऊर्जाका परियोजनामध्ये १२५ मेगावाट डोटी जिल्लाको दिपायलमा र अर्को २२५ मेगावाटको डडेल्धुराको अमरगढी नगरपालिकामा निर्माण हुने भएको छ । ३५० मेगावट यी दुई परियोजनाको लागत करिब २३ अर्ब  रुपैयाँ रहेको पनि लगानी बोर्डले जानकारी दिएको छ ।

मंगलवारको बैठकले डाबर नेपाल उद्योगको क्षमता अभिवृद्धि तथा उत्पादन विविधीकरण  गर्न ९ अर्ब ६८ करोड ६३ लाख ४२ हजार ज्ञण् रुपैयाँको लगानी स्वीकृत  गर्ने निर्णय पनि गरेको छ । 

बैठकले तल्लो अरुण जलविद्युत् परियोजनाको निर्माण, स्वमित्वकरण, सञ्चालन तथा हस्तान्तरण  (बुट मोडल)बाट विकास गर्न छनोट भएको प्रस्तावक कम्पनी एसजेभीएन लिमिटेड इण्डियाले पेश गरेको प्रारम्भिक प्रतिवेदन स्वीकृत गर्ने निर्णयसमेत गरेको छ । 

बैठकले लगानी प्रवर्द्धनका सम्बन्धमा विभिन्न संघ संस्थासँग समझदारीपत्र गर्न कार्यालयलाई अख्तियारी दिएको छ । त्यसै गरी जेनेभास्थित वर्ल्ड एशोसिएसन अफ पीपीी युनिट्स एण्ड प्रोफिेसनल्स संस्थाको सदस्यता ग्रहण गर्नसमेत स्वीकृति प्रदान गरेको छ ।

लगानी बोर्डको कार्यालयबाट तयार गरिएको नेपालमा रासायनिक मल कारखाना स्थापना गर्ने प्रविधिको तुलनात्मक अध्ययनसम्बन्धी प्रतिवेदन सार्वजनिक गर्ने निर्णय पनि भएको बोर्डका सहसचिव तथा प्रवक्ता भगवान अर्यालद्वारा जारी एक प्रेस विज्ञप्तिमा उल्लेख  छ ।

बैठकमा प्रधानमन्त्री देउवाले लगानीकर्ताहरूलाई आकर्षित गर्न आवश्यक नीतिगत तथा कानूनी सुधार गरी लगानीमैत्री वातावरण तयार गर्न सरकार प्रतिबद्ध रहेको  बताएका छन् । उनले आर्थिक विकासका लागि लगानी बोर्डको कार्यालय तथा नेपाल सरकारका सम्बन्धित निकायले पूर्वाधार संरचनामा विविधीकरण गरी सम्भाव्यता अध्ययनसम्बन्धी कार्यहरुलाई तीव्र  रूपमा अगाडि बढाउँदै परियोजना निर्माणमा जोड दिनका लागि निर्देशन समेत दिए ।

बोर्डका प्रमुख कार्यकारी अधिकृत सुशील भट्टले अघिल्लो बोर्ड बैठकले निर्देश गरेबमोजिम परियोजना कार्यान्वयन, सहजीकरण तथा विकास एवं संस्थागत सुधारका सम्बन्धमा भएका प्रगति विवरण पेश गरेका छन् । उनले लगानी बोर्डको कार्यालयले अगाडि बढाएका गतिविधिहरूको बारेमा समेत बोर्डलाई जानकारी गराएका थिए ।