सभामुख अग्निप्रसाद सापकोटाले संसदमा आफू ‘अम्पायर’ मात्रै भएको र निर्णायक भूमिकामा राजनीतिक दलहरू नै रहेका बताएका छन् । 

सिंहदरबारमा भएको सर्वदलीय बैठक सकेर बाहिरिने क्रममा संक्षिप्त प्रतिक्रिया दिँदै उनले संसद सञ्चालन गराउनेबारे बैठकमा छलफल भएको जानकारी दिए ।

‘बैठकमा प्रस्तुत भएका सबैको धारणालाई गम्भीरतापूर्वक सुनेको छु । सभामुखको हैसियतले स्वतन्त्र हैसियतले निर्णय गर्नुपर्छ । मेरो भूमिका अम्पायरको मात्रै हो । निर्णायक त राजनीतिक दलहरू नै हुन्,’ सापकोटाले भने । 

४ घण्टा चलेको बैठक सजीव, जीवन्त र स्तरीय भएको भन्दै सापकोटाले बैठकमा एमसीसीदेखि संसदमा विचाराधीन रहेको विधेकसम्म विस्तृतमा छलफल भएको जानकारी दिए । 

‘बैठकले आगामी दिनमा पहल गर्नको लागि सबैलाई आधार दिएको छ । विपक्षसँग निरन्तर छलफल, अन्तक्र्रिया गरेर सदन सञ्चालन गर्नेबारे धेरै कोणबाट छलफल भएको छ, विपक्ष दलको उपस्थिति भएको भए बैठक निष्कर्षमा पुग्थ्यो होला,’ उनले भने । 

राष्ट्रिय महत्त्वका विषयमा साझा धारणा बनाउन पहल गर्ने निर्णय भएको उनले बताए ।

‘संसदमा विचाराधीन भएर बसेका विधेयकका बारेमा छलफल भएको छ । नागरिकता विधेयक, नागरिक उडड्यन, हवाई विधेयक, कतिपय विधेकहरू राष्ट्रिय सभाबाट पारित भएका छन् । त्यसलाई पारित गर्न लाग्नुपर्नेछ,’ सापकोटाले भने, ‘समसामयिक विषयका हरेक  विषयमा विहंगम र व्यापक छलफल भएको छ । यस्ता छलफल राखेर पहल र प्रयत्न गर्ने कुरा भएको छ ।’