नेकपा माओवादी केन्द्रका अध्यक्ष पुष्पकमल दाहाल प्रचण्डले एमसीसी अनुमोदन हुँदा खुशी लागेको प्रतिक्रिया दिएका छन् ।

सोमवार पत्रकार सम्मेलन आयोजना गरी समसामयिक विषयमा धारणा सार्वजनिक गर्ने क्रममा उनले एमसीसी अनुमोदन हुँदा देश दुर्घटनाबाट बच्यो भनेर खुशी लागेको बताएका हुन् । 

एमसीसीकै कारण शान्ति सम्झौता दुर्घटनामा पर्ने, संविधान डिरेल हुने र गठबन्धन टुट्यो भने धेरै चिज उल्टिने खतरा देखेपछि बीचको बाटो खोजेर एमसीसी अनुमोदन गरेको उनले बताए ।

देशलाई दुर्घटनामा जान नदिन व्याख्यात्मक घोषणा गरेर एमसीसी अनुमोदनको लागि पार्टीमा निर्णय गराएको उनले बताए ।

एमसीसीका विषयमा लामो विवाद र छलफल भएपछि गठबन्धनमा ‘असहमत हुन सहमत हुने’ सहमति गरेको तर, त्यसले काम नगरेको पनि उनले बताए । 

‘हामीले एग्री टू डिसएग्रीको सहमति गरेका थियौं । तर, त्यसले काम गरेन । सरकार बदल्ने, गठबन्धन भत्काउने प्रयास हुन थाल्यो । त्यसलाई रोक्न पनि कुनै न कुनै उपाय निकालेर एमसीसी अनुमोदन गर्नुपर्ने अवस्था आयो,’ प्रचण्डले भने ।  

एमसीसी अनुमोदनका लागि तत्कालीन नेकपामा आफैंले व्याख्यात्मक घोषणासहित पारित गर्न प्रस्ताव गरेको उनले दाबी गरेका छन् ।