राप्रपा नेपालका अध्यक्ष कमल थापाले देश विश्व महाशक्तिको चलखेलको केन्द्र बनेको बताएका छन् । 

धुम्वाराहीमा शनिवार भएको राष्ट्रिय प्रजातान्त्रिक युव संगठन नेपालको घोषणा सभालाई सम्बोधन गर्दै उनले देश एमसीसीका कारण चीन र अमेरिकाको चलखेलको केन्द्र बनेको बताएका हुन् । 

‘एमसीसी ठीक कि बेठीक भन्ने अर्को कुरा भयो,’ उनले भने, ‘तर डरलाग्दो के हो भने नेपाल विस्तारै विश्व महाशक्तिको चलखेलको केन्द्र बन्न लागेको स्पष्ट छ ।’

उनले विदेशी रणनीतिक प्रतिस्पर्धाका कारणले सिंगो नेपाल दुई ध्रुवमा बाँडिन पुगेको समेत बताए । 

‘अमेरिकाका पदाधिकारीहरू भन्छन्, चाँडो निर्णय गर नत्र खारेज गर्छौं,’ उनले भने, ‘चीनका पदाधिकारी भन्छन् नेपाललाई दबाब दिएर अनुदान दिनु हुँदैन । अनुदानका विषयमा हामीले आफूले निर्णय गर्ने कुरा हो । हित हुन्छ भने लिन्छौं नत्र लिन्नौं ।’

यसले नेपालको स्वतन्त्रता, सार्वभौमिकता र अस्तित्वमाथि प्रश्न चिह्न खडा भएको उनको भनाइ छ ।