नेपाली कांग्रेसका नेता प्रकाशमान सिंहले मिलेनियम च्यालेन्ज कर्पोरेसन (एमसीसी) ले नेपालको अर्थतन्त्रमा टेवा पुर्‍याउने बताएका छन् ।

काठमाडौं निर्वाचन क्षेत्र नम्बर १ अन्तर्गत शंखमूलमा आयोजना गरेको बुथ कार्यसमिति गठन समारोहमा बोल्दै उनले एमसिसी नेपालको हितमा रहेकाले कांग्रेसले प्रतिपक्षमा रहेको बेलामा पनि एमसीसीको वकालत गरेको बताए ।

‘एमसीसी मुलुकको अर्थतन्त्रलाई टेवा पुर्‍याउने काममा लगानी हुन थालेकाले नेपालको हितमा छ भनेर कांग्रेसले सरकार र प्रतिपक्षमा हुँदा आवाज उठाउँदै आएको हो,’ उनले भने । उनले विपक्षी दलले सरकारमा हुँदा एउटा र सरकारबाट बाहिरिएपछि अर्को कुरा गर्न नमिल्ने बताए ।

नेता सिंहले केही दलले एमसिसीका बारेमा राष्ट्रघाती भनेर गलत प्रचार गर्दै हिँडेकोमा आपत्ति जनाए । ‘के एमसीसी राष्ट्रघाती भएको भए संसद्बाट पारित हुन्थ्यो त ?’ उनले प्रश्न गरे ।

एमसीसीबारे जनतालाई घरघरमा गएर बुझाउने जिम्मा कांग्रेसको काँधमा आएको उनको भनाइ छ ।