यस्तो छ निर्वाचन आयोगले गरेका महत्त्वपूर्ण ६ काम

निर्वाचन आयोगले फागुन २६ देखि ३० गतेसम्म गरेका काम कारवाही सार्वजनिक गरेको छ । यो बीचमा आयोगले ६ वटा काम सम्पन्न गरेको जनाएको छ । 

उम्मेदवारले खर्च गर्न पाउने रकमको हद निर्धारण, निर्वाचन अनुगमन निर्देशिका २०७८, स्थानीय तह निर्वाचन सञ्चालन आर्थिक व्यवस्थापन कार्यविधि २०७८ समेत आयोगले स्वीकृत गरेको छ । 

स्थानीय तहको निर्वाचन प्रयोजनका लागि ८० वटा राजनीतिक दलहरूले दिएको निवेदनका आधारमा जाँचबुझ गर्दा ७९ वटा राजनीतिक दलहरू दर्ता भएको आयोगले जनाएको छ ।

२०७८ फागुन २६ गतेदेखि ३० गतेसम्म आयोगले गरेको काम कारवाही यस्तो छ :

१.    आगामी स्थानीय तह निर्वाचनमा भाग लिने उम्मेदवारको लागि आयोगले मिति २०७८।११।२६ मा प्रचलित कानून बमोजिम उम्मेदवारले खर्च गर्न पाउने रकमको हद (संलग्न बमोजिम) निर्धारण गरेको छ । 

२.    स्थानीय तह निर्वाचन, २०७९ का लागि आयोगले मिति २०७८।११।२९ मा निर्वाचन अनुगमन निर्देशिका, २०७८ र मिति २०७८।११।३० मा स्थानीय तह निर्वाचन संचालन आर्थिक व्यवस्थापन कार्यविधि, २०७८ स्वीकृत गरेको छ । त्यसैगरी निर्वाचन पर्यवेक्षण निर्देशिका, २०७८ समेत स्वीकृत भई कार्यान्वयनमा आएको छ । 

३.    स्थानीय तहको निर्वाचन प्रयोजनका लागि दर्ता हुन निवेदन प्राप्त भएका ८० (असी) वटा राजनीतिक दलहरुको निवेदनका सम्बन्धमा जाँचबुझ गरी मिति २०७८।११।२६ को आयोगको निर्णय अनुसार ७९ वटा राजनीतिक दलहरु दर्ता भएका छन् ।

४.    मतदाता नामावली अद्यावधिक (दाबी विरोध समेत) कार्यक्रम, २०७८ अन्तर्गतका त्रुटि सच्याउने, दोहोरो परेको हटाउने र मृत्यु भएकाको विवरण हटाउने कार्यहरु भई रहेका छन् । 

५.    आगामी स्थानीय तह निर्वाचनमा खटिने मुख्य निर्वाचन अधिकृत तथा निर्वाचन अधिकृतहरुको नामावली सम्बन्धित निकायबाट प्राप्त भएको छ र खटनपटनको गृहकार्य भइरहेको छ ।

६.    स्थानीय तह निर्वाचनमा आयोगले करिब एक महिनाको अवधिमा सम्पादन गरेका कृयाकलापहरुको जानकारी एवम् अन्य विविध विषयमा छलफल तथा अन्तरक्रिया गर्ने प्रयोजनका लागि मिति २०७८।११।२७ गते राजनीतिक दलहरुसँग छलफल कार्यक्रम सम्पन्न भएको छ ।