ब्याटमिन्टन च्याम्पियन प्रिन्सलाई जापानी कम्पनीले ३२ लाख दिने, ८ महिना विदेशमा तालिमको सुविधा

विश्व ब्याण्डमिन्टन जुनियरतर्फ पहिलो नम्बरका खेलाडी प्रिन्स दाहाललाई जापानी खेल कम्पनीले ३२ लाख रुपैयाँ दिने घोषणा गरेको छ ।

ललितपुरको ट्रिनिटी होटलमा मंगलवार एक कार्यक्रम आयोजना गरेर सहयोग सम्बन्धी सम्झौता भएको छ ।

जापानको ब्राण्डेड खेल उपकरण उत्पादन गर्ने कम्पनी योनेक्स सनराइजले दाहाललाई प्रत्येक वर्ष ८ लाख रूपैयाँका दरले ४ वर्ष निरन्तर सहयोग उपलब्ध गराउने सम्झौता गरेको हो । 

सम्झौताअनुसार अब प्रिन्सलाई योनेक्सले ४ वर्षसम्म ८ लाख रुपैयाँका दरले सहयोग उपलब्ध गराउने छ । त्यसबाहेक हरेक वर्ष २ महिनाका लागि भारत वा इन्डोनेसियामा तालिमका लागि पठाउने र त्यसको सबै खर्च योनेक्सले नै व्यहोर्ने भएको छ । 

खेल सामग्री उत्पादन कम्पनीले प्रिन्सको सबै खेल गतिविधि ४ वर्षसम्म योनेक्सको सोसल मिडिया एकाउन्ट र वेबसाइटमा राखेर प्रवद्र्धन गर्ने भएको छ । 

प्रिन्सले आफ्नो एथलेट म्यानेजरको रूपमा ४ वर्षका लागि विकास खेतानलाई नियुक्त गरेका छन् । खेतानले भारतको पुनेबाट स्पोर्ट्स म्यानेजमेन्टमा स्नातकोत्तर गरेका छन् ।

प्रिन्सका लागि दिइएको खेल सुविधा घोषणा कार्यक्रममा नेपालका ब्याटमिन्टन खेल जगतका प्रतिष्ठित व्यक्तिको उपस्थिति थियो ।

कार्यक्रमलाई सम्बोधन गर्दै नेपाल ब्याटमिन्टन संघका उपाध्यक्ष नरेशबहादुर सिंहले प्रिन्सलाई आगामी दिनमा अन्तर्राष्ट्रियस्तरको खेलमा भाग लिने वातावरण बनाउने दायित्व संघको भएको बताए । अन्तर्राष्ट्रियस्तरको खेलमा नियमित सहभागी हुन पाउँदा मात्रै प्रिन्सले विश्व वरियतामा अझ राम्रो नतिजा ल्याउन सक्ने सिंहले बताए ।

संघका बोर्ड सदस्य सुभाष श्रेष्ठले प्रिन्सलाई दक्ष तालिम दिन आफूले सक्दो मेहनत गरेको बताए । प्रिन्सलाई २ महिनाको तालिमका लागि हुने सम्पूर्ण खर्च राष्ट्रिय खेलकुद परिषद्ले व्यहोर्ने व्यवस्थाका लागि सदस्य सचिवसँग मौखिक सहमति गरेको श्रेष्ठले बताए ।

कार्यक्रममा बोल्दै पूर्व ब्याटमिन्टन खेलाडी प्रताप अधिकारीले प्रिन्स दाहालले पाएको सुविधाको प्रशंसा गरेका थिए । ‘हामीले खेल्ने समयमा अहिलेको जस्तो सुविधा थिएन । कसैले हाम्रा लागि आर्थिक खर्च समेत गर्दैन्थे । अहिले त खेलाडीलाई प्रायोजन गर्न कम्पनीहरू नै अघि सरेर आउँछन्,’ अधिकारीले भने । 

कार्यक्रममा योनेक्स सनराइजका प्रतिनिधि राजु बास्तोलाले प्रिन्सलाई खेल सामग्री समेत हस्तान्तरण गरेका थिए ।