मधेश प्रदेश सभाको आजको बैठक स्थगित भएको छ ।

बैठकमा आवश्यक गणपूरक संख्यामा प्रदेश सभा सदस्य उपस्थित नभएपछि सभामुख सरोजकुमार यादवले बैठक बिहीवार बिहान ११ बजेसम्मका लागि स्थगित गरेका हुन् । 

बैठकको शुरूमै प्रतिपक्षी दलका प्रदेश सभाका सदस्यले बैठकका लागि आवश्यक गणपूरक संख्या उपस्थित नरहेकाले बैठक स्थगित गर्न माग गरेका थिए ।

बैठकको शुरूमै बोल्दै लोकतान्त्रिक समाजवादी पार्टीका प्रदेशसभा सदस्य तथा सचेतक परमेश्वर साहले बैठकका लागि चाहिने आवश्यक गणपूरक संख्या उपस्थित नरहेकाले बैठक स्थगित गर्नुपर्ने बताए । 

आजको प्रदेश सभा बैठकमा प्रदेश प्रमुख कार्यालयबाट प्राप्त विधेयक प्रमाणीकरणसम्बन्धी पत्र वाचन गर्ने, प्रदेश सरकारका आन्तरिक मामिला तथा सञ्चारमन्त्री भरतप्रसाद साहद्वारा प्रस्तुत प्रदेश प्रहरी ऐन कार्यान्वयनसम्बन्धी संकल्प प्रस्तावमाथि समेत छलफल हुने कार्यसूची थियो । 

यस्तै आजको बैठकमा प्रदेश सरकारका उद्योग, पर्यटन तथा वनमन्त्री सत्रुधन महतोले प्रदेश पर्यटन प्रवर्द्धन तथा व्यवस्थापन सम्बन्धमा व्यवस्था गर्न बनेको विधेयक प्रस्तुत गर्ने कार्यसूची रहेको प्रदेश सभा सचिवालयका सचिव रन्जितकुमार यादवले जानकारी दिए ।