नेकपा एमालेका उपाध्यक्ष तथा पूर्व अर्थमन्त्री विष्णु पौडेलले चुनावका नाममा कसैले पटाका पड्काउँदैमा एमाले नतर्सिने बताएका छन् ।

एमालेका लागि गठबन्धन कुनै नयाँ कुरा नभई जति दल मिलेर गठबन्धन गरे पनि त्यसले कुनै फरक नपर्ने उनले बताए । 

देशको ‘ड्राइभिङ लिड’ गर्ने पार्टी एमाले रहेको बताउँदै उनले कसैले तर्साउन पटका पड्काउँदैमा विशाल जनआधार भएको पार्टीले केही तत्विक असर नपर्ने दाबी गरे । 

प्रेस चौतारी नेपाल रुपन्देहीले बुधवार बुटवलमा आयोजना गरेको सम्मान कार्यक्रममा बोल्दै नेता पौडेलले भने, ‘सरकार निर्वाचन रोक्ने पक्षमा थियो । एमाले बलियो हेम्बर लिएर उत्रिएपछि चुनाव घोषणा गर्न बाध्य भयो । अहिले फेरि गठबन्धन गरिएको छ । त्यो गठबन्धनको पटाकाले एमालेलाई केही गर्दैन ।’

नेता पौडेलले भने, ‘गठबन्धनले केही दिनेवाला छैन । एमालेको विजययात्रा कसैले रोक्न सक्दैन । २०७४ सालको निर्वाचनभन्दा आउँदो वैशाखको निर्वाचनमा हामीले गुणात्मक रूपमा प्रगति गर्छाैं ।’

विभिन्न षड्यन्त्रले एमाले अहिले प्रतिपक्षमा पुगे पनि आसन्न तीनै तहका निर्वाचनपछि एमालेले सबै तहका सरकारको नेतृत्व गर्ने उनले बताए । प्रधानमन्त्रीसहित सत्तारुढ गठबन्धनले एमाले बलियो रहेको स्वीकार गरेको पौडेलले बताए । 

अहिले परमादेशी सरकार रहेको अवस्थामा चुनावपछि जनादेशको सरकार आउने उनले बताए । देशभर अहिले एमालेको जनलहर बढेको पौडेलले बताए ।