जलविद्युतमा लगानी गर्दै कर्णाली प्रदेश सरकार

कर्णाली  प्रदेश  सरकारले जलविद्युत्  आयोजनामा  लगानी  गर्ने  भएको  छ ।

प्रदेश  सरकारले  कर्णालीमा  निर्माण  हुने  ठूला  विद्युत् परियोजनामा   सेयर   साझेदारी   गर्ने   नीतिअनुसार विभिन्न   जलविद्युत्   आयोजनामा   लगानी   गर्न  लागेको हो ।

आर्थिक  मामिला  तथा  योजनामन्त्री  विन्दमान विष्टले   प्रदेश   सरकारले   जगदुल्ला   हाइड्रोपावर आयोजनामा  सेयर  साझेदारी  गर्ने  जानकारी  दिए ।

डोल्पामा  निर्माण  हुन  लागेको  १०६  मेगावाट  क्षमताको यो आयोजनामा कर्णाली सरकारले ११ करोड ७१ लाख ५० हजार रुपियाँ लगानी गर्ने भएको छ ।

मन्त्रिपरिषद्को बैठकले उक्त रकमबाट ११ लाख ७१ हजार पाँच सय कित्ता सेयर किन्ने निर्णय गरेको हो । यस्तै  दैलेखको  अपर  पराजुली  खोलामा  सम्पन्न भएको  दुई  दशमलब  १५  मेगावाटको  जलविद्युत् आयोजनाका  लागि  प्रदेश  सरकारले  लगानीबमोजिम पाँच करोड रुपियाँ सुनिश्चित गर्ने निर्णय गरेको छ ।  गोरखापत्र दैनिकमा मुना हमालले खबर लेखेका छन्  ।