नेपाली कांग्रेसको भरतपुर महानगरपालिकाका वडा सभापतिहरूले कांग्रेसले मेयरको उम्मेदवार नपाए सबै वडामा कांग्रेसले स्वतन्त्र उम्मेदवार उठाएर विद्रोह गर्ने चेतावनी दिएका छन् । 

उनीहरूले महानगरपालिकाको कुनै पनि पदमा गठबन्धन नगर्न पार्टी नेतृत्वलाई ध्यानाकर्षण गराएका छन् । 

जिल्ला पार्टी कार्यालय भरतपुरमा उपलब्ध २७ जना वडा सभापतिको बैठकले महानगरपालिकाको मेयर, उपमेयर, वडाध्यक्ष र वडा सदस्य सबै पदमा कांग्रेसकै उम्मेदवार हुनुपर्ने निर्णय गरेको हो । भरतपुर नगरपालिकामा २९ वडा छन् । 

वडा सभापतिले गरेको निर्णयमा भनिएको छ, ‘नेपाली कांग्रेसको केन्द्र, जिल्ला तथा महानगरले गठबन्धन गर्ने निर्णय गरे पनि हामी वडा सभापतिहरू कुनै पनि गठबन्धन नगर्ने निर्णय गर्दछौं ।’ 

सभापतिहरूले मेयर, उपमयेरसहित सबै वडामा नेपाली कांग्रेसका अध्यक्षसहित ५ जना नै उम्मेदवार उठाउने निर्णय गर्नुका साथै गठबन्धनका सबै उम्मेदवारलाई बहिष्कार गर्ने निर्णय पनि गरेका छन् । 

२७ वडा सभापतिको निर्णय जिल्ला सभापति राजेश्वर खनाललाई बुझाइएको छ ।