स्थानीय तह चुनावमा खटिएका निर्वाचन अधिकृत र निर्वाचन कार्यालयको जिम्मा सशस्त्र प्रहरीले पाएको छ । 

आगामी वैशाख ३० गते हुने देशभरका ७५३ स्थानमा रहेका जिल्ला निर्वाचन प्रमुख, निर्वाचन कार्यालय, प्रमुख निर्वाचन अधिकृतको सुरक्षाको जिम्मा सशस्त्रले पाएको हो । 

‘हामीले देशभरका निर्वाचन प्रमुख, प्रमुख निर्वाचन अधिकृत र निर्वाचन कार्यालयको सुरक्षाको जिम्मा पाएका छौं,’ सशस्त्र प्रहरी बल प्रधान कार्यालय एक उच्च अधिकृतले लोकान्तरलाई भने, ‘पीएसओ नभएका जिल्ला निर्वाचन प्रमुखहरूको पीएसओ खटिने जिम्मा पनि हामीमा नै छ ।’

सशस्त्र प्रहरीले आफ्नो निर्वाचन सुरक्षा योजना केन्द्रीय निर्वाचन सुरक्षा समितिमा पठाएर पास भएपछि जिल्ला र तालिम केन्द्रहरूमा त्यसैअनुसार तालिम दिइरहेको छ ।

निर्वाचनमा सशस्त्र प्रहरी बलले दोस्रो घेरामा रहेर सुरक्षा दिनेछ । सशस्त्रले निर्वाचनको समयमा फौजलाई कसरी परिचालन गर्ने भन्ने एकीकृत योजनासमेत बनाएको एपीएफले जनाएको छ ।