मोरङको लेटाङमा महिला प्रहरीको हत्या आरोपमा पक्राउ परेकामध्ये १० आरोपीलाई  मोरङ अदालतले धरौटीमा छाड्न आदेश दिएको छ । 

मोरङ अदालतका न्यायाधीश शिशिरराज ढकालको इजलासले मंगलवार कर्तव्य ज्यान मुद्दाका आरोपीबाट जनही ५० हजार रुपैयाँ धरौटी लिने आदेश गर्दै रिहा गरेको छ ।

अदालतको आदेशपछि धरौटी रकम लिएर रिहा गरिएको मोरङ अदालतका सूचना अधिकारी हेमबहादुर बुढाथोकीले जानकारी दिए । 

अदालतको आदेशसँगै कृष्ण विश्वकर्मा, डम्बरबहादुर कार्की, विशेष मगर, सन्तोष कुँवर, कुमारबहादुर खोक्रेल, कपिल नेपाली, समिर राई, मनकुमार महरा, अनिल विश्वकर्मा र लेखबहादुर मगर ५० हजार धरौटीमा रिहा भएका छन् । मुद्दाका ५ आरोपी फरार छन् ।

अभद्र व्यवहार गरेको अभियोगमा मुद्दा खेपिरहेका १५ जना नाबालकलाई पनि न्यायाधीश ढकालको इजलासले अभिभावकको जिम्मा लगाउने आदेश दिएको छ ।

लेटाङ–५ खेरुवास्थित शिक्षा माध्यमिक विद्यालयका शिक्षक मनोज पौडेलले ६ कक्षामा अध्ययनरत बालिकालाई यौन दुर्व्यवहार गरेको घटना चर्किएपछि शान्तिसुरक्षाका लागि गएको प्रहरीमाथि आक्रमण हुँदा चैत ६ गते राति २६ वर्षीया महिला प्रहरी जवान उर्मिला श्रेष्ठको हत्या भएको थियो ।

घटनामा संलग्न भएको भन्दै मोरङ प्रहरीले १४ वर्षीय नाबालकसहित १६ जनाविरुद्ध आजीवन कैदको माग गर्दै गत बुधवार जिल्ला अदालतमा कर्तव्य ज्यान मुद्दा दर्ता गरेको थियो । तीमध्ये ५ जना फरार छन् । कर्तव्य ज्यान मुद्दा परेका नाबालकलाई गत मंगलवार न्यायाधीश ढकालकै इजलासले अभिभावकको जिम्मा लगाउन आदेश दिएको थियो ।

प्रहरीले घटनामा ६७ जना प्रत्यक्ष रूपमा संलग्न भएको ठहर गर्दै ६२ जनालाई नियन्त्रणमा लिएर अनुसन्धान गरेको थियो । त्यसमध्ये १ नाबालकसहित १६ जना कर्तव्य ज्यानमा संलग्न भएको ठहर गर्दै आजीवन कैदको माग गर्दै कर्तव्य ज्यान मुद्दा दर्ता गरिएको थियो ।

प्रहरीले ५१ जनाविरुद्ध अभद्र व्यवहारमा मुद्दा चलाएको थियो । त्यसमध्ये १५ जना नाबालक थिए । सूचना अधिकृत बुढाथोकीका अनुसार अभद्र व्यवहारका ५१ जनामध्ये सरकारी वकिल कार्यालय र अनुसन्धान अधिकृतले सञ्जीव प्रधान, जस्वीन तामाङ, श्रवण यादव, अर्पण परियार, रामकुमार राई, अमृत खेवालिम्बु, रुपेश रानामगर, सुजन अधिकारी, चन्द्रकान्त लामा, पासाङ तामाङ र प्रह्लाद खड्कालाई कुनै दाबी नपुगेको भन्दै मुद्दा नचल्ने निर्णय गरेको थियो ।

चैत ६ गते आइतवार साँझ मोरङको लेटाङमा उत्तेजित भीडमा मारिएकी २६ वर्षीया प्रहरी जवान उर्मिला श्रेष्ठको मृत्यु गोली लागेर भएको पुष्टि भएपछि घटना थप रहस्यमयी बनेको छ । श्रेष्ठलाई लागेको गोली प्रहरीको हो वा उत्तेजित भीडबाट पनि गोली चलेको थियो भन्ने पुष्टि हुन सकेको छैन । घटनामा प्रहरीले २ दर्जन बढी हवाइ फायर गरेको थियो ।

प्रारम्भिक चरणमा प्रहरीले श्रेष्ठको मृत्यु उत्तेजित भीडले धारिलो हतियार प्रहार गर्दा भएको बताउँदै आएको थियो तर पोस्टमार्टम रिपोर्टमा उनको मृत्यु ‘सक प्रिजेन्ट वाई फाइयर आम इन्जुरी’का कारण भएको र घाँटीमा गोली फेला परेको उल्लेख गरिएपछि घटना थप शंकास्पद बनेको छ । श्रेष्ठको घाँटीबाट छिरेको गोली पेटसम्म पुगेको पोस्टमार्टम रिपोर्टमा उल्लेख छ ।

प्रहरीकै गोली लागेर प्रहरीकै मृत्यु भएको हो कि भन्ने आशंकामा मृतकको शरीरमा भेटिएको गोली र प्रहरीका हतियारका गोली विधि विज्ञान प्रयोगशालामा परीक्षण गर्दा मेल नखाएपछि भीडबाटै चलेको गोलीले श्रेष्ठको मुत्यु भएको पुष्टि भएको मोरङका प्रहरी प्रमुख एसपी शान्तिराज कोइरालाले बताए । घटनास्थलमा १० थान सट गनको खोका फेला पर्नुले भीडबाट पनि गोली चलेको पुष्टि हुने कोइरालाको भनाइ छ ।

छात्रामाथि यौन दुर्व्यवहारको आरोप लागेका शिक्षक मनोज पौडेल पुर्पक्षका लागि जेल चलान भएका छन् । जिल्ला अदालतका न्यायाधीश दुर्गा खड्काको इजलासले पुर्पक्षका लागि थुनामा राख्ने आदेश दिएको छ ।