त्रिभुवन    अन्तर्राष्ट्रिय    विमानस्थलको    आन्तरिक  टर्मिनलमा  बम  राखिएको  सूचनापछि  बुधबार केही समय आन्तरिकतर्फको उडान प्रभावित भएको छ ।

बुधबार बिहान ९ः४० देखि ९ः५५ को समयमा विदेशबाट अपरिचित व्यक्तिले विमानस्थलमा फोन गरेर आन्तरिक टर्मिनलमा सातवटा बम रहेको र दुई घण्टाभित्र विस्फोट हुने चेतावनी दिएपछि उडान प्रभावित भएको हो ।

सूचना  पाएलगत्तै  नेपाल  प्रहरी  र  नेपाली  सेनाले सर्च अप्रेसन शुरू गरेको थियो । सेनाको बम डिस्पोजल  टोलीले  तालिमप्राप्त  कुकुरको  मद्दतले  टर्मिनल भवनसहितका क्षेत्रमा गरेको सर्च अप्रेसनमा कुनै पनि शङ्कास्पद वस्तु नभेटेपछि बिहान ११ः१० बजेदेखि  उडान  नियमित  भएको  विमानस्थल  कार्यालयले जनाएको छ ।

विमानस्थलस्थित    नागरिक    उड्डयन    कार्यालयका  प्रवक्ता  टेकनाथ  सिटौलाले  भ्रामक  सूचना दिने व्यक्तिको खोजी भइरहेको जानकारी दिए ।

यो समयमा अन्तर्राष्ट्रियतर्फ भने कुनै उडान प्रभावित भएनन् । विमानस्थल      कार्यालयका      प्रहरी      वरिष्ठ उपरीक्षक (एसएसपी) भीमप्रसाद ढकालले विमानस्थलको सुरक्षा व्यवस्था प्रभावकारी र चुस्त रहेकाले कुनै शङ्कास्पद गतिविधि हुने सम्भावना नरहेको बताए । हाल   विमानस्थलको   आन्तरिकतर्फको   सुरक्षामा नेपाल प्रहरीका झन्डै चार सय जनशक्ति सुरक्षामा खटिँदै आएका छन् । विमानस्थलको बाहिरी सुरक्षाको जिम्मा नेपाली सेनाले लिँदै आएको छ । गोरखापत्र दैनिकमा खबर छ ।