नेकपा एमालेका उपाध्यक्ष रामबहादुर थापा बादलले माओवादी केन्द्र विसर्जन, विघटन र पतनको दिशामा अगाडि बढेको आरोप लगाएका छन् । 

कांग्रेससँग चुनावी तालमेल गरेर माओवादी पुँजीपतिको सेवक बनेको उनले टिप्पणी गरे । 

चितवनको भरतपुरमा आयोजित चुनावी सभालाई सम्बोधन गर्दै नेता थापाले आफ्नो विचारबाट च्युत भएकोले माओवादी पतनको दिशामा गएको आरोप लगाएका हुन् । 

‘अस्ति माओवादीका उम्मेदवारले पुच्छर टेलर मात्र हो, पूरा फिल्म देखाउन बाँकी छ भनेको सुनेका थियौँ । माओवादी केन्द्रले कांग्रेससँग गरेको प्रहसन थियो । दुःखान्त नाटक देख्न बाँकी छ,’ पूर्व माओवादी नेता थापाले भने, ‘माओवादी केन्द्र विसर्जन, विघटन र पतनको दिशामा अगाडि बढेको छ । श्रमजीवी आफ्नो विचार, सिद्धान्तबाट च्युत भएको छ ।’ 

सम्बोधनका क्रममा थापाले भरतपुरमा मेयरकी प्रत्यासी माओवादी उम्मेदवार रेनु दाहालको भनाइलाई गलत उद्धरण गरे । रेनुले पाँच वर्षको समयमा विकासको ट्रेलर देखाएको र आगामी दिनमा वास्तविक विकास देखाउने बताएकी थिइन् ।