हावाहुरी र चट्याङ जस्ता प्राकृतिक विपत्तिको घटनामा परेर ५ जनाको मृत्यु भएको छ  । यस्तै १२ जना घाइते भएका छन् । राष्ट्रिय विपद् जोखिम न्युनिकरण तथा व्यवस्थापन प्राधिकरणका अनुसार बितेको २४ घण्टामा सो घटनाबाट मानवीय क्षति भएको हो । 

प्राविधकरणको बुलेटिनअनुसार चितवनमा हावाहुरीका कारण ३ जनाको मृत्यु भएको छ भने २ जना घाइते भएका छन् । भरतपुर महानगरपालिका ११ स्थित भोजाड जङ्गल स्थित भित्री सडकखण्डमा गुडिरहेको ना २ ह २२४७ नम्बर को अटोमा हावाहुरीको कारण रुख ढलेर च्यापिन जाँदा २ जनाको मृत्यु भएको हो । यस्तै घाइते २ जनाको भरतपुर अस्पतालमा उपचार भइरहेको छ । 
यसैगरी चितवनकै बसेनीमा गुडिरहेको ना१ ज ६१४० नम्बरको म्याजिकमा रुख ढल्दा म्याजिक चालकको मृत्यु भएको छ । 

यसैगरी खोटाङको खोटेहाङ गाउँपालिका ३ सावाकटहरे चण्डीथान बस्ने बर्ष ४३ की महिलाको चट्याङ लागेर मृत्यु भएको छ । उनी शौचालय गएको बेला चट्याङ परेको प्राधिकरणले जनाएको छ । 
यस्तै यसैगरी सुनसरीको तरहरामा पनि चट्याङ लागेर एक् पुरुषको मृत्यु भएको छ । मोबाइल चलाएर बसिरहेको बखत चट्याङ लाग्न पुगेको थियो । 

यसैगरी प्युठानको झिमरुक गाउँपालिका ५ माझगाँउ बस्ने बर्ष २५ की महिला आफ्नै घरमा बसिरहेको अवस्थामा नजिकै परेको चट्याङ्ग लागेर घाइते हुन पुगेको प्रहरीले जनाएको छ । यसैगरी कैलालीको लम्किचुहा नगरपालिका ८ गोप्का स्थित भित्री सडकमा गुडिरहेको से १ ख १८०६ नम्बरको बसमाथि हावाहुरीको कारण सुकेको रुख ढल्न जाँदा बसमा सवार ८ जना घाइते भएका छन् । घाइतेहरुको स्थानीय अस्पतालमा उपचार भइरहेको शनिबारको बुलेटिनमा जनाइएको छ ।