संसदको प्रमुख प्रतिपक्ष दल नेकपा एमालेले मूल्यवृद्धि नियन्त्रण गर्न र पेट्रोलियम पदार्थमा बढाइएको मूल्यवृद्धि फिर्ता गर्न माग गर्दै जरूरी सार्वजनिक महत्त्वको प्रस्ताव संसद सचिवालयमा दर्ता गरेको छ । 

एमालेका प्रमुख सचेतक विशाल भट्टराई प्रस्ताव र सांसदहरू यज्ञराज सुनुवार, गणेशकुमार पहाडी र राष्ट्रिय प्रजातन्त्र पार्टीका अध्यक्ष एवं सांसद राजेन्द्रप्रसाद लिङ्देनले उक्त प्रस्तावको समर्थन गरेका छन् । 

एमालेका सांसदहरू मंगलवार दिउँसो जरुरी सार्वजनिक महत्त्वको प्रस्ताव लिएर सिंहदरबारस्थित संसद् सचिवालय पुगेका थिए । 

एमालेले ६ वटा कारण उल्लेख गरेर सार्वजनिक महत्त्वको प्रस्ताव दर्ता गरेको छ । पेट्रोलियम पदार्थको मूल्यवृद्धि फिर्ताको माग गर्न, इन्धनमा भइरहेको चुहावट र अत्याधिक कर न्यूनीकरण गरी पेट्रोलियम पदार्थको मूल्य घटाउन, सरकारसँग इन्धनको मूल्य घटाउनेबारे कार्ययोजना माग्न, कमजोर आयस्रोत भएको वर्गमा परेको बहुआयामिक प्रभावको विश्लेषणसहितको प्रतिवेदन सरकारसँग माग गर्न जरूरी सार्वजनिक महत्त्वको प्रस्ताव आवश्यक भएको संसदमा दर्ता भएको प्रस्तावमा उल्लेख छ । 

त्यसै गरी हुँदा खाने वर्गको जनजीवन सहज बनाउन सरकारको योजनाबारे जानकारी माग्न, मूल्यवृद्धि नगर्न, सरकारले गरिरहेको पहलबारे जानकारी लिन पनि यस्तो प्रस्ताव आवश्यक परेको भनिएको छ । 

पकाउने ग्यास, डिजेल र पेट्रोललगायतका पदार्थको मूल्य बढ्दा त्यसको समाधानको उपायबारे सरकारले प्रमुख प्रतिपक्षसँग छलफल नै नगरेको एमालेको आरोप छ ।

संसदमा दर्ता हुन आएको जरुरी सार्वजनिक महत्त्वको प्रस्ताव सभामुखले संसदमा छलफल गराउनुपर्ने कानूनी व्यवस्था छ ।