मल ल्याउँछु भन्दै सरकारले किसानलाई ढाँटिरहेको छ- पद्मा अर्याल

एमाले नेतृ पद्माकुमारी अर्यालले सरकारले मल ल्याउँछु भन्दै किसानलाई ढाँटिरहेको आरोप लगाएकी छन् । 

शनिवार संसदको नीति तथा कार्यक्रममाथिको छलफलमा उनले भनिन्,  ‘सबै ठेक्का रद्द भएको छ । मल आउने सम्भावना छैन तर सरकारले नीति तथा कार्यक्रममा भने मलको सुनिश्चितता गर्ने भनेर किसानलाई ढाँटिरहेको छ ।’

सरकारले मल आउने आधार नै तय नगरी किसानलाई किन ढाँटेको भन्दै शनिवार संसदमा बोल्ने क्रममा उनले सरकारलाई प्रश्न पनि गरेकी छन् ।

पूर्व कृषिमन्त्रीसमेत रहेकी उनले ६५ प्रतिशत किसान लाभान्वित हुने र किसानलाई आवश्यक पर्ने मल सरकारले दिन नसकेको आरोप लगाइन् । 

वार्षिक साढे १३ लाख मेट्रिकटन मल नेपाललाई आवश्यक पर्ने तर सरकारले खेती किसानी लगाउने बेला मल अभाव गर्ने गरेको पनि उनको आरोप छ । 

उनले किसानलाई मलका कारण भएको क्षतिको राहत दिनुपर्ने बताएकी छन् ।