काठमाडौंबाट भद्रपुर उडेको बुद्ध एयरको जहाजमा प्राविधिक समस्या आएको छ । प्राविधिक समस्या आएपछि सो जहाज काठमाडौं विमानस्थलमै फर्किएको छ । 

जहाज उडेको केही मिनेटमै प्राविधिक समस्या देखिएको भन्दै क्याप्टेनले जहाजलाई काठमाडौं नै  डाइभर्ट गरेको बुद्ध एयरका सञ्चार संयोजक दीपेन्द्र कर्णले जानकारी दिए । 

उनका अनुसार ९५३ उडान नम्बरको उक्त जहाजको पछिल्लो टायरको रबरका टुक्रा धावनमार्गमा भेटिएपछि जहाज काठमाडौं फिर्ता गर्न भनिएको थियो । त्यसपछि सो जहाज तुरुन्तै फिर्ता आएको हो । यो जहाज काठमाडौंबाट ३० नटिकल माइल मात्रै उडेको थियो । 

यो जहाज काठमाडौं फिर्ता हुँदा केही समय काठमाडौं विमानस्थल बन्द गरिएको विमानस्थल कार्यालयको भनाइ छ । उक्त जहाज त्रिभुवन विमानस्थलमा सुरक्षित अवतरण गरेको छ । 

अहिले जहाजको प्राविधिक पक्षको जाँच भइरहेको छ । उक्त जहाजका यात्रुलाई अर्कोमा राखेर भद्रपुर पठाइसकिएको कर्णले जानकारी दिए ।