सरकारले विश्व बजारमा मूल्यको उतारचढावका कारण मल आपूर्तिमा असहजता भएको दाबी गरेको छ । 

प्रतिनिधि सभा बैठकमा सोमवार जवाफ दिँदै कृषि विकास तथा पशुपक्षी विकास मन्त्री महिन्द्र राय यादवले अन्तर्राष्ट्रिय बजारमा भएको मूल्यवृद्धिका कारण आपूर्ति असहज भएको बताएका हुन् । 

नेकपा एमालेले संसदमा पेश गरेको स्थगन प्रस्तावमाथि जवाफ दिने क्रममा मन्त्री यादवले सरकारले मल ल्याउन पहल गरिरहेको बताए । तर, कहिलेदेखि मल उपलब्ध हुन्छ भन्नेबारे गोलमटोल जवाफ दिए । 

गत वर्ष ५५ रूपैयाँ रहेको युरिया मलको मूल्य ९८ र गतवर्ष ८२ रूपैयाँ रहेको डीएपी १५० रूपैयाँ पुगेको मन्त्री यादवले बताए । 

प्रधानमन्त्री शेरबहादुर देउवाको भारत भ्रमणका बेलामा पनि भारतसँग मल खरीदको विषयमा कुराकानी भए पनि मल आउन नसकेको उनले बताए । 

चालू आर्थिक वर्षका लागि कृषि सामग्री कम्पनीबाट एक लाख ५ हजार तथा साल्ट टे«डिङ कम्पनीसँग एक लाख १७ हजार मेट्रिकटन गरी दुई लाख २२ हजार मेट्रिकटन मल खरीद गर्ने सहमति भए पनि आपूर्तिकर्ताले समयमा ल्याउन नसकेका कारण मलको अभाव भएको मन्त्री यादवले बताए । 

भारतबाट एक लाख ५० हजार मेट्रिक टन खरीद गर्नका लागि कृषि सामग्री कम्पनीबीच खरीद सम्झौता अन्तिम चरणमा रहेको बताए । 

भारत सरकारसँग फेब्रुअरी २८ तारिखमा भएको सहमतिअनुसार भारत सरकारले ८० हजार मेट्रिकटन नेपाली सीमामा पुर्‍याइदिने सहमति भए पनि मूल्यमा सहमति भइनसकेको उनले बताए ।