नेकपा एमालेका नेता एवं पूर्व रक्षामन्त्री भीम रावलले अमेरिकी राज्य साझेदारी कार्यक्रम (एसपीपी) मा सहभागिताका लागि तत्कालीन प्रधानमन्त्री सुशील कोइराला र शेरबहादुर देउवाले प्रधानसेनापतिलाई पत्र लेख्न लगाएको जानकारीमा छ/छैन भनी प्रश्न गरेका छन् । 

विनियोजन विधेयक अन्तर्गत रक्षा मन्त्रालयको शीर्षक माथिको छलफलमा उठेका प्रश्नको गृहमन्त्री बालकृष्ण खाँणले जवाफ दिएपछिको पुरक प्रश्नमा रावलले एसपीपीमा भविष्यमा समेत सहभागी नहुने प्रतिबद्धता सरकारसँग खोजेका हुन् ।

‘सन् २०१५ मा तत्कालीन प्रधानमन्त्री सुशील कोइरालाले प्रधानसेनापतिलाई राज्य साझेदारी कार्यक्रममा पत्र लेख्न अह्राएको जानकारी छ/छैन, यस्तै सन् २०१७ मा शेरबहादुर देउवाले पत्र लेख्न अह्राएको जानकारी छ/छैन ?’ रावलले प्रश्न गरे, ‘नेपालको संविधानले निर्दिष्ट गरेको परराष्ट्र नीति विपरीत अमेरिकी राज्य साझेदारीमा कहिल्यै सहभागी नहुने कुराको प्रतिबद्धता मन्त्रीजीको छ/छैन ?’