नेकपा(एमाले)का सांसद झपट रावलले बलात्कार सावित भए बलात्कारीको लिंग छेदन गर्नुपर्ने बताएका छन् । 

बुधवार प्रतिनिधि सभाअन्तर्गतको कानून, न्याय तथा मानव अधिकार समितिको बैठकमा बोल्दै उनले यस्तो बताएका हुन् । 

‘बलात्कार साबित भयो भने बलात्कारीको लिङ्ग छेदन गर्दा पनि हुन्छ,’ उनले भने, ‘कतिपय ३–४ वर्ष सँगै बसेका छन्, कुरा नमिल्दा बलात्कार मुद्दा लगाएका छन्, यसलाई पनि हामीले वर्गीकरण गर्नुपर्छ ।’

उनले विभिन्न उमेर समूह र प्रकृतिअनुसार बलात्कारको घटनालाई वर्गीकरण गर्दै सोहीअनुरुपको कानूनी व्यवस्था गर्नुपर्ने बताए । 

‘नाबालकको हकमा हुने बलात्कारको सम्बन्धमा एउटा गर्नुपर्छ, नाबालक भित्र पनि समान उमेरका सम्बन्धमा एउटा गर्नुपर्छ,’ उनले भने, ‘उमेर पुगेकाहरूका हकमा, ज्येष्ठ नागरिकको हकमा एउटा गर्नुपर्छ । यसलाई समग्र यौनसँग जोडिएका, यौनबाट प्रताडित भएका जो उमेर समूहहरू छ यसका समग्र पक्षलाई समेट्ने गरी कानून बनाउनुपर्छ ।’

उनले महिला मात्रै भन्ने हो भने यो कानून पर्याप्त नहुने उनले बताए । ‘के नेपाली समाजभित्र महिला मात्रै छन् ? हो, संख्यात्मक हिसाबले के देखाउँछ भने महिलाहरू संख्यात्मक हिसाबले बढी पीडित हुनुहुन्छ,’ उनले भने, ‘तर यति मात्रैमा केन्द्रित रहेर हामीले कानून बनायौँ भने पछि फेरि पुरुष पनि बलात्कृत भयो भनेर हामीले फेरि कानून बनाउने हो त ? नेपालमा लिङ्ग भनेको महिला र पुरुष मात्रै हो ?’

यस्तै उनले यौन हिंसाको घटनामा बालिकाहरू मात्रै नभई बालकहरू पनि पीडित हुने भन्दै पीडित बालकहरूलाई समेत सम्बोधन हुने गरी कानून बन्नुपर्ने बताए ।